डिभी पर्नेले बहिनी ल्यायो, बहिनीले छोरो ल्याइन्, छोरोले बम पड्कायो
प्रकाशित मिति : मंसिर २७, २०७४ बुधबार
सोमबार न्युयोर्कमा बम आक्रमणको प्रयास गर्ने आत्मघाती आक्रमणकारी डिभी लोटरीकै माध्यमबाट अमेरिका आएको खुलासा भएपछि अमेरिकाको अध्यागमन प्रणालीबारेको बहस थप चुलिएको छ । अक्टोबरको अन्तिममा न्युयोर्कमा गाडी जोताएर ८ जनाको ज्यान लिने व्यक्ति पनि डिभी लोटरीबाटै अमेरिका आएको थियो ।
सोमबार टाइम्स स्क्वायर नजिक आक्रमणको प्रयास गर्ने बंगालादेशी नागरिक उनका मामालाई परेको डिभी लोटरीबाट अमेरिका आएको पुष्टी भएको छ । सुरुमा मामालाई डिभी परेपछि अमेरिकामा आएर नागरिकता लिएका थिए । त्सपछि उनले आफ्नी बहिनीका लागि आवेदन दिएका थिए । बहिनीले अमेरिका आफ्नो छोरालाई पनि अमेरिका ल्याइन् । तीनै छोराले टाइम्स स्क्वायरमा बम आक्रमणको प्रयास गरेको महान्यायाधिवक्ता जेफ सेसनले बताएका छन् ।
जेफ सेसनले अमेरिकाको अध्यागमन प्रणाली र चेन माइग्रेशनको पनि विरोध गर्दै अमेरिकाको असफल अध्यागमन प्रणालीका कारण नै बम आक्रमणको प्रयास भएको बताएका छन् ।
अमेरिकाको होमल्याण्ड सेक्युरिटीकी नवनियुक्त सेक्रेटरी क्रिस्जेन नेल्सनले पनि आफ्नो प्रशासनले अमेरिकाको सम्पूर्ण अध्यागमन प्रणालीमा सुधार ल्याउने योजना बनाएको बताएकी छिन् । आतंकबादीहरुलाई अमेरिका आउनबाट रोक्न सुरक्षाका नयाँ मापदण्डहरु अपनाइने पनि उनले बताएकी छिन् । सरकारले व्यक्तिले आफ्ना टाढाका नातेदार समेत अमेरिका ल्याउनसक्ने प्रणाली र डिभी लोटरी खारेज गर्न योजना बनाइरहेको उनले बताइन् । त्यसको साटो क्यानडा र अष्ट्रेलियाको जस्तो प्वाइन्ट सिस्टम लागु गर्नुपर्नेमा उनले जोड दिइन् ।