कार्टर सेन्टरद्वारा प्रतिनिधि र प्रदेशसभा चुनावको प्रंशसा
प्रकाशित मिति : मंसिर २३, २०७४ शनिबार
मंसिर २३,काठमाडौ द कार्टर सेन्टरले प्रतिनिधिसभा र प्रदेशसभाको निर्वाचनको सकारात्मक मूल्यांकन गर्दै प्रशंसा गरेको छ । सेन्टरले निर्वाचनको पर्यवेक्षण गरेको थियो ।
शनिबार पत्रकार सम्मेलन गरी सेन्टरले सुरक्षा चुनौती र अस्थिर निर्वाचन प्रक्रियाका बाबजुद निर्वाचन आयोगले दुवै चरणको निर्वाचन प्रक्रियाको तयारी र सञ्चालनको राम्रो व्यवस्था गरेको जनाएको छ । थाइलान्डका भूतपूर्व प्रधानमन्त्री डा. सुराकियार्त सथिरथाई र भूपू अमेरिकी राजदूत पिटर बर्लेले पर्यवेक्षक टोलीको नेतृत्व गरेका थिए ।
सेन्टरका पर्यवेक्षकहरुले पहिलो चरणमा ६८ र दोस्रो चरणमा २१४ मतदान केन्द्रहरुको भ्रमण गरेको थियो । सेन्टरको निर्वाचन पर्यवेक्षन मिसनद्वारा जारी प्रेस विज्ञप्तीमा भनिएको छ–‘सेन्टरका पर्यवेक्षकले दुवै चरणको चुनावको मतदान प्रक्रिया संचालनको सकारात्मक मूल्यांकन गरेको छ । चुनावी प्रक्रिायका धेरै पक्षहरुमा थप सुधार ल्याउनुपर्ने भए पनि प्रक्रियाहरु अहिलेसम्म सामान्यतया राम्रै तरिकाले संचलान भएको निष्कर्ष निकालेका छौं ।’
सेन्टरको पर्यवेक्षण मिसन टोलीमा ३४ राष्ट्रबाट आएका ६४ जना पर्यवेक्षकहरु सहभागी थिए । सेन्टरले मतदाता शिक्षा भने कमजोर भएको जनाएको छ ।