कखरा सिकेको स्कूलबाट मतदान गर्दै प्रधानमन्त्री देउवा
प्रकाशित मिति : मंसिर २१, २०७४ बिहीबार
मंसिर २१, डडेल्धुरा, प्रधानमन्त्री शेरबहादुर देउवाले गृहजिल्ला डडेल्धुराबाट मतदान गरेका छन् । प्रधानमन्त्री देउवाले गन्यापधुरा गाउँपालिका–१ मा रहेको असिग्राम मावि मतदान केन्द्रबाट मतदान गरेका हुन् ।
देउवाले यसै विद्यालयबाट प्रारम्भिक शिक्षा हासिल गरेका थिए । २००३ सालमा जन्मिएका देउवाले कक्षा ३ सम्मको प्रारम्भिक शिक्षा तत्कालीन असिग्राम प्राविबाट लिएका थिए । कक्षा ८ सम्म डडेल्धुरा सदरमुकामको महेन्द्र माविमा पढेका देउवाले कक्षा ९ र १० सम्मको पढाइ डोटीको जिजोडामाडौं उचाकोटमा रहेको सिताराम माविमा पूरा गरेका थिए । २०१९ सालमा एसएलसी पास गरेपछि देउवा उच्च शिक्षा अध्ययनका लागि काठमाडौं आएका थिए ।
आफ्नो जन्मघर नजिकै रहेको मतदान केन्द्रबाट मतदान गरेका देउवाले सञ्चारकर्मीसँग संक्षिप्त प्रतिक्रिया दिँदै अब देशमा आर्थिक विकास हुने आशा व्यक्त गरे ।