ब्यालेस्टिक मिसाइल पृथ्वीभन्दा माथि गएर फेरि वायुमण्डलमा प्रवेश गर्न सक्ने उत्तर कोरियाको दाबी
प्रकाशित मिति : मंसिर १४, २०७४ बिहीबार
काठमाडौं, १४ मंसिर । उत्तर कोरियाले परीक्षण गरिएको अन्तरमहादेशीय ब्यालेस्टिक मिसाइल पृथ्वीको वायुमण्डल भन्दा माथि गएर फेरि वायुमण्डलमा प्रवेश गर्न सक्ने खालको रहेको दाबी गरेको छ ।
उत्तर कोरियाले दाबी गरे पनि बुधबार सबेरै प्योङयाङबाट परीक्षण गरिएको ब्यालेस्टिक मिसाइलमा यस्तो क्षमता रहे नरहेको बारे विशेषज्ञले पुष्टि भने गरेका छैनन् । उत्तर कोरिया अहिले नै त्यस्तो खालको प्रविधि विकास गर्न सफल भएकोमा विशेषज्ञले शंका व्यक्त गरेका हुन् । उत्तर कोरियाले भने पछिल्लो मिसाइल आफूहरुले अहिलेसम्म परीक्षण गरेका मध्ये सबैभन्दा शक्तिशाली रहेको र यसले आफ्नो देशको परमाणु अभियानले तोकिएको लक्ष्य पाएको दाबी गरेको छ । उत्तर कोरियाका नेता किम जोन–उनले बुधबार गरिएको मिसाइल परीक्षण निष्पक्ष रहेको र यो आफ्नो देशका लागि ब्रेकथ्रु पनि भएको बताएका छन् । मिसाइल परीक्षणको अन्तर्राष्ट्रिय समुदायबाट आलोचना भएको छ । उत्तर कोरियाको गतिविधिका कारण दक्षिण कोरिया, जापान, अमेरिकासहितका देशमा तनाव बढेको छ । अमेरिकी राष्ट्रपति डोनाल्ड ट्रम्पले यसविषयमा चीनका राष्ट्रपति सी जिनपिङसंग टेलिफोन वार्ता पनि गरेका छन् । ट्रम्पले चीनसंग उत्तर कोरियालाई मनाउन सबै किसिमको प्रयास गर्न आग्रह गरेका छन् । चीन उत्तर कोरियाको ठूलो सहयोगीको रुपमा रहदै आएको छ । यस्तै अमेरिकाले उत्तर कोरिया विरोध पक्षलाई सहयोग गर्न विश्व समुदायसँग आग्रह पनि गरेको छ ।