चितवनमा निर्वाचन विरोधी गतिविधि गर्ने ३९ जना पक्राउ
प्रकाशित मिति : मंसिर १२, २०७४ मंगलबार
मंसिर १२ चितवन। प्रदेश र प्रतिनिधिसभा सदस्य निर्वाचन नजिकिदै गर्दा चितवनको सुरक्षा व्यवस्था कडा बनाइएको छ । निर्वाचन विरोधी गतिविधि र गुन्डागर्दी बढेको भन्दै सुरक्षा निकायले सुरक्षा सतर्कता बढाएको जनाएको छ ।
निर्वाचन विरोधी गतिविधि र गुन्डागर्दी गर्ने ३९ जनालाई प्रहरीले पक्राउ गरेको छ । निर्वाचनकेन्द्रित सुरक्षा योजना लागू भएपछि प्रहरीले उनीहरुलाई पक्राउ गरेको बताएको छ । प्रहरीका अनुसार पक्राउ पर्नेमा नेत्रविक्रम चन्द विप्लव समूहको नेपाल कम्युनिष्ट पार्टीका २० जना र गुन्डागर्दीमा संलग्न १९ जना रहेका छन् ।
जिल्ला प्रहरी कार्यालय, सशस्त्र प्रहरी र नेपाली सेनाले संयुक्त रुपमा सञ्चालन गरेको विशेष सुरक्षा योजनाका कारण जिल्लामा सुरक्षाको अवस्था मजबुत रहेको छ ।