अध्यागमनका कैयन मुद्दामा सहमति नजुटे ११ दिनपछि अमेरिकी सरकार ठप्प
प्रकाशित मिति : मंसिर १२, २०७४ मंगलबार
अध्यागमनका कैयन मुद्दामा सहमति नजुटे डिसेम्बरको पहिलो साता संसदबाट सरकारी खर्चबारेको विधयेक पारित हुने सम्भावना कम रहेको र पारित नभएमा डिसेम्बर ८ देखि अमेरिकी सरकार ठप्प हुने भएको छ । रिपब्लिकनहरुले डेमोक्र्याट सांसदहरुलाई आफ्नो पक्षमा लिएर विधयेक पारित गर्न नसकेमा सरकार ठप्प हुने सम्भावना रहेको छ । यदि खर्च सम्बन्धि विधयेक पारित नभएमा राजनीतिक दलको संसद र ह्वाइट हाउसमा पकड भएको बेलामा समेत सरकार ठप्प हुने घटना अमेरिकी इतिहासमा नै पहिलो हुनेछ ।
अमेरिकी सिनेटलाई संघीय बजेट पारित गर्न ६० वटा भोटको आवश्यकता पर्छ । तर अमेरिकी सिनेटमा ५२ जनामात्र रिपब्लिकन सांसदहरु रहेका छन् । ८ जना डेमोक्रेटिक सांसदहरुले समर्थन नगरे बजेट पारित हुने सम्भावना रहन्न । त्यसैले बजेटबारे समर्थन जुटाउन रिपब्लिकनहरुले ८ जना डेमोक्रेटिक सांसदहरुको समर्थन जुटाउन प्रयास गरिरहेका छन् ।
डेमोक्रेटिक सांसदहरुले केही अध्यागमनबारेका विषयमा रिपब्लिकनहरुले ग्यारेन्टी नगरेसम्म बजेटबारेको विधयेक पारित गर्ने सम्भावना देखिन्न । डेमोक्रेटिक सांसदहरुले डिफर्ड एक्सन फर चाइल्डहुड एराइभल अर्थात् डाका कार्यक्रम लगायतका विषयमा रिपब्लिकन सांसदहरुबाट ग्यारेन्टी खोजिरहेका छन् ।
राष्ट्रपति ट्रम्पले मार्च अगाडि नै डाका कार्यक्रमबारे समाधान खोज्न संसदलाई आब्हान गरेको सन्दर्भमा केही डेमोक्रेटिक सांसदहरुले डाकाको समस्या समाधान नगरेसम्म बजेटबारेको विधयेकमा हस्ताक्षर नगर्ने बताएका छन् । खासगरी डेमोक्रेटिक सांसदहरु बर्नी स्याण्डर्स, कोरी बु्रकर र कमला ह्यारिसले डाका कार्यक्रमको अन्त्यको विपक्षमा आवाज उठाउदै आएका छन् । बर्नी स्याण्डर्सले ट्वीट गर्दै भनेका छन् – ‘डाकाको स्थायी समाधान नभएसम्म मैले सरकारी खर्चसम्बन्धि विधयेकमा हस्ताक्षर गर्नेछैन ।’