सबै बोलौं, नत्र नलम्बिन सक्छ टीपीएसको अवधि
प्रकाशित मिति : आश्विन ३, २०७३ सोमबार
श्री पराजुली
नेपालमा गतबर्षको महाभूकम्पपछि अमेरिकी सरकारले अमेरिकामा रहेका नेपालीहरुलाई टीपीएस प्रदान गर्ने घोषणा गरेपछि अमेरिकामा रहेका कागजपत्रविहिन नेपालीहरुलाई धेरै फाइदा भएको छ । खासगरी अमेरिकी अध्यगमन अदालतले देश निकालाको आदेश दिएका, दिने प्रकृयामा रहेका र विना भिसा सिमापार गरेर अमेरिका प्रवेश गरेका नेपालीहरुलाई टीपीएसमार्फत धेरै सजिलो भएको छ । उनीहरुले अमेरिकामा बस्नमात्र होइन, डिपोर्टेशनको डरविना काम गर्ने सुविधा समेत प्राप्त गरेका छन् । त्यो बाहेक अमेरिकामा ओभरस्टे भएर बसेकाहरु र विद्यार्थी लगायतका गैर आप्रवासी भिसामा रहेकाहरुलाई पनि टीपीएसमार्फत लाभ मिलेको छ । टीपीएसकै कारण अमेरिकी अध्यागमन इतिहासमै पहिलोपल्ट चालु आर्थिक बर्षमा नेपालीहरुले अमेरिकामा बस्न पाउनेगरी अदालतबाट सुविधा प्राप्त गर्नु निकै सकारात्मक कुरा हो । साथै ८ बर्षको इतिहासमा नै सबैभन्दा कम नेपालीहरुले देश निकालाको फैसला पाउनु अर्को सकारात्मक पक्ष हो ।
टीपीएसबाट धेरै नेपालीहरुले फाइदा लिने प्रयास गरेपनि डिपोर्टेशनको प्रकृयामा रहेका नेपालीहरुसमेत टीपीएसमार्फत अमेरिकामा बस्ने नेपालीहरुलाई सबैभन्दा ठूलो राहत भयो । लामो समय पहिले अमेरिका प्रबेश गरेका तर इमिग्रेसन सम्बन्धि फाइदा वा राहत नलिएकाहरुले पनि टीपीएसमार्फत राम्रो फाइदा लिए । भिसा सकिएर ओभरस्टे भएर अमेरिकामा बसेकाहरु टीपीएसमार्फत नेपाल गएर आफन्तलाई भेट्न पाए । अमेरिकामा शरणार्थीका लागि आवेदन दिएका तर अस्वीकृत भएर डिपोर्टेशनको प्रकृयामा रहेकाहरुले अमेरिकामा निर्धक्क बस्न पाउने र काम गर्न पाउने वातावरण तयार भयो ।
अमेरिकामा विना भिसा सिमाना पार गरेर आउनेहरुको अवस्था भयाभह नै थियो । कैयन नेपालीहरु जेलमा थिए । तर नेपाललाई टीपीएसको दर्जा प्रदान गर्नासाथ टीपीएस सुविधा पाएको देशको मानिसलाई डिटेन्सनमा राख्न नमिल्ने आधारमा उनीहरुलाई छाडियो । साथै उनीहरुले वर्क परमिट पनि पाए । यद्यपी टीपीएसका कारण केही अनपेक्षित र अनुमान नगरेका घटनाहरु पनि भए । न्युयोर्क बाहिरका केही न्यायाधिसहरुले टीपीएस पाएका नेपालीहरुको एसाइलमका मुद्दा बन्द गरिदिए । यद्यपी त्यस्ता फैसलाबिरुद्ध अपिल गरेपछि कैयन नेपालीहरुले त्यस्ता मुद्दाहरु जिते । त्यस्तै कतिपय ठाउँमा नेपाललाई टीपीएसको दर्जामा राख्नासाथ नेपालीहरुलाई डिटेन्सन सेन्टरबाट छाडियो । तर कतिपय डिटेन्सन सेन्टरहरु भने कडा रुपमा देखिए । टीपीएसका लागि आवेदन दिइसकेपछि पनि डिटेन्सन सेन्टरमा राखिएका नेपालीहरुलाई छाड्नमा समस्या देखियो ।
टीपीएसबाट यसरी धेरै नेपालीहरुले फाइदा लिएपनि अमेरिकी सरकारले अनुमान गरेभन्दा निकै कमलेमात्र टीपीएसका लागि आवेदन दिए । टीपीएसका बारेमा गलत सुचनाहरु प्रवाह गरिंदा टीपीएसका लागि योग्य र टीपीएस आवश्यक भएकाहरुले पनि टीपीएसका लागि आवेदन दिएनन् । अहिले टीपीएस स्वीकृतिमा पनि निकै ढिलाई भइरहेको छ । टीपीएस आवेदनकर्तालाई थप कागजात माग्दै युएसीआईएसबाट पत्र पठाउने गरिएको छ । कतिपय सन्दर्भमा राम्रोसँग टीपीएसको आवेदन नभर्दा र फर्ममा सोधिएका प्रश्नको सही जवाफ नदिएका कारण पनि यस्तो भएको देखिन्छ ।
अमेरिकी सरकारले अपेक्षा गरे अनुशार आवेदनहरु नपर्दा टीपीएसको अवधि लम्बिनेमा आशंका बढेको छ । त्यसैले टीपीएसको अवधि लम्बाउन अहिले नै पहल थाल्न जरुरी छ । टीपीएसको अवधि लम्बाउनेमात्र होइन, नयाँ आवेदन पनि दिन पाउने वातावरण बनाउन पहल थाल्न आवश्यक छ । यसै सन्दर्भमा हामीले अमेरिकामा रहेको नेपाली दूतावासमार्फत अमेरिकी सरकारसँगको पहलका लागि अनुरोध पनि गरेका छौं । यसका लागि चौतर्फी पहल हुन आवश्यक छ ।
कुराकानीमा आधारित ।