अमेरिकी अध्यागमनले बाबुबाट अलग्यायो एकबर्षका नाबालक छोरा
प्रकाशित मिति : मंसिर ९, २०७४ शनिबार
अमेरिकी अध्यागमनले अमेरिकामा बस्दै आएका एकजना बाबुबाट नाबालक छोरा खोसेपछि त्यस्तो कार्यलाई अमानवीय भन्दै आलोचना गरिएको छ । युएस इमिग्रेशन एण्ड कस्टम इन्फोर्समेन्ट आइसले ३० बर्षका एक साल्भाडोरिएन पिताका बच्चालाई नियन्त्रणमा लिएको थियो र ति एकबर्षका बालकलाई कहाँ राखिएको छ भन्ने समेत गोप्य राखेको थियो । एल साल्भाडोरका होसे डेमार शरण खोज्दै अमेरिकामा आएका थिए । उनले गत आइतबार मेक्सिकोको सिमा क्षेत्रबाट गैर कानुनी रुपमा अमेरिका छिरेर आफू र आफ्ना बच्चाका लागि शरणको अनुरोध गरेका थिए । तर बिहिबार उनलाई र उनका छोरालाई अलग्याइएको थियो । त्यसपछि छोरालाई कहाँ राखियो भन्नेबारे केही बताइएको थिएन ।
ती बाबुले छोरासँगको सम्बन्ध प्रमाणित गर्ने कुनै कागजात पेश गर्न नसकेका कारण उनलाई नाबालाकबाट अलग्याइएको आइसले जनाएको छ । आइसका प्रवक्ताका अनुशार ती व्यक्तिसँग बालकलाई छोरा प्रमाणित गर्ने पासपोर्ट, जन्म दर्ता प्रमाणपत्र वा अन्य कुनै कागजात थिएन । तर अधिकारवादीहरुले भने बाबु होसे डेमार आफ्ना छोरा माटेओको जन्म दर्ता प्रमाणपत्र र आफ्नो साल्भाडोरिएन फोटो आईडी हातमा बोकेर नै अमेरिका छिरेको दावी गरेका छन् ।