मधेसी मोर्चाले बुझायो सहिद सूची,गम्भीर घाइते र खर्च विवरण
प्रकाशित मिति : आश्विन २, २०७३ आईतबार
संयुक्त लोकतान्त्रिक मधेसी मोर्चाले मधेस आन्दोलनका क्रममा मारिएका थप १६ जनालाई सहिद घोषणा गर्नुपर्ने माग गर्दै सरकारलाई ज्ञापनपत्र बुझाएको छ । मोर्चाले यसअघि ५२ जनाको सहित सूची सरकारलाई बुझाएको थियो ।
आइतबार कार्यवाहक प्रधानमन्त्री समेत रहेका गृहमन्त्री विमलेन्द्र निधिलाई भेटी मोर्चाका नेताहरुले सहिद घोषणा हुन बाँकी सहिद सूची, जीवनपर्यन्त भरणपोषणका लागि गम्भीर घाइतेको नामावली तथा विभिन्न अस्पतालमा उपचारको खर्च विवरणसमेत बुझाएको छ । सद्भावनाका महासचिव मनीष सुमनले सहिद घोषणा हुन बाँकी १६ जना र आन्दोलनमा घाइते भई अङ्गभङ्ग भएका ३३ जनालाई जीवनपर्यन्त भरणपोषणका लागिसमेत गृह मन्त्रालयलाई सूची बुझाएको छ ।
मोर्चालाई गृह मन्त्रालयले मन्त्रिपरिषद्ले सम्बोधन गर्न बाँकी रहेको सूची माग गरेको थियो । सोही मागअनुसार मोर्चाको सचिवालयले सहिद घोषणा गर्न बाँकी १६, भरणपोषण गर्नुपर्ने ३३ जना घाइते र उपचार खर्चबारे सूची पेस गरेको हो । मुद्दा फिर्ता लिनुपर्नेको सूची पनि मोर्चाको सचिवालयले बुझाएको छ ।
मुद्दा फिर्ता लिन जटिल
मधेस आन्दोलनका केही मुद्दा फिर्ता लिन जटिल रहेको गृह मन्त्रालयको भनाइ छ । मुद्दा फिर्ता लिन मिल्ने कि नमिल्ने भन्ने कुरामा अध्ययन भइरहेको गृह मन्त्रालयका प्रवक्ता यादवप्रसाद कोइरालाले जानकारी दिए । मधेसी मोर्चाले मुद्दा चलाएका आन्दोलनकारीको सूची गृह मन्त्रालयमा बुझाएपछि सरकारी तथ्यांकमा रहेका मुद्दा र मोर्चाले बुझाएको मुद्दाको सूचीलाई गृह मन्त्रालय र महान्यायाधिवक्ताको कार्यालयले अध्ययन थालेको कोइरालाको भनाइ छ । सबैभन्दा बढी मुद्दा कैलालीमा
मोर्चाले तयार गरेको मुद्दा चलाइएका आन्दोलनकारीको सूचीमा कैलाली जिल्लाबाट सबैभन्दा बढी छन् ।