मोर्चाले घाइते र मृतकको विवरण आज बुझाउने
प्रकाशित मिति : आश्विन २, २०७३ आईतबार
संयुक्त लोकतान्त्रिक मधेसी मोर्चाले मधेस आन्दोलनमा घाइते भएका तथा मृतकको विवरण सरकारलाई बुझाउने भएको छ ।मधेसी मोर्चा सचिवालयको शनिबार बसेको बैठकले आन्दोलनमा घाइते तथा मृतकको विवरण कार्यबाहक प्रधानमन्त्री एवं गृहमन्त्री विमलेन्द्र निधिलाई आइतबार बुझाउने भएको छ । हुन त यसअघि पनि ६८ जना मृतक र ४९१ जनामाथि मुद्दा लागेका तथा थुनामा रहेकाको विवरण गृह मन्त्रालयमा बुझाएको थियो ।
बुझाइएको मृतकको विवरणमध्ये ५२ जनालाई सरकारले सहिद पनि घोषणा गरिसकेको छ भने केही घाइतेले उपचारबापत रकम पनि प्राप्त गरिसकेका छन् । मोर्चाको एक घटक तराई मधेस सद्भावना पार्टीका वरिष्ठ नेता रामनरेश राय यादवका अनुसार ६८ जनामध्ये १६ जनालाई सहिद घोषणा नगरेपछि मोर्चाले गृहमन्त्री निधिलाई भेटेर आपत्ति व्यक्त गरेका थिए ।
त्यसरी आपत्ति व्यक्त गरेपछि गृहमन्त्री निधिले १६ जना मधेस आन्दोलनको क्रममै मृृत्यु भएको ठोस तथ्यसहित विवरण पेस गर्न भनेपछि मोर्चाका नेताले थप विवरण तयार गरेका हुन् । १६ जना विभिन्न चरणको मधेस आन्दोलनमा नै मृत्यु भएको दाबीसहितको विवरण आइतबार बुझाउन लागिएको हो ।
त्यसैगरी, एक हजार पाँच सय घाइतेको विवरण पनि बुझाउन लागिएको छ । नेता यादवका अनुसार, पन्ध्र सय घाइतेमध्ये ३२ जना पूर्ण अशक्त रहेका छन् । विवरणमा घाइतेले कहाँ कहाँ उपचार गराएका छन्, कति रकम बाँकी छ त्यसको विवरण पनि बुझाउन लागिएको बताइएको छ । घाइतेले उपचार गराएको कतिपय अस्पताल तथा औषधि पसलको रकम बाँकी छ भने कतिपय ठाउँमा कुनै व्यक्तिले बुझाएको छ, जसको तिर्न बाँकी रहेको पनि विवरणमा उल्लेख गरिएको स्रोतले जनाएको छ ।