आज प्रधानमन्त्री प्रचण्ड–मोदी भेटवार्ता
प्रकाशित मिति : भाद्र ३१, २०७३ शुक्रबार
प्रधानमन्त्री पुष्पकमल दाहाल प्रचण्डको भारत भ्रमणका दोस्रो दिन आज(शुक्रबार) भारतीय प्रधानमन्त्री नरेन्द्र मोदीसँग भेटवार्ता हुँदैछ। हैदराबाद हाउसमा दुवै देशका प्रधानमन्त्रीको उपस्थितिमा नेपाल र भारतका उच्च अधिकारीहरुले विभिन्न आधा दर्जन समझदारी पत्रमा हस्ताक्षर गर्ने भएका छन्।
मोदी र प्रचण्डको एक्लै भेटघाट पनि हुने तय गरिएको छ। यसलगत्तै प्रचण्ड र मोदीले संयुक्त पत्रकार सम्मेलनलाई सम्बोधन गर्ने कार्यक्रम छ।प्रचण्डले शुक्रबार बिहान ९ बजे राष्ट्रपति भवनमा सेरेमोनियल रिसेप्सनमा भाग लिनेछन् जहाँ उनले गार्ड अफ अनरको निरीक्षण गर्नेछन् । ९ः३० मा प्रचण्डले राजघाटमा महात्मा गान्धीलाई श्रद्धाञ्जली अर्पण गर्नेछन् ।
पहिलो उच्चस्तरीय भेटघाटका क्रममा प्रचण्डलाई भारतीय विदेशमन्त्री स्वराजले बिहान १०ः३० राष्ट्रपति भवनमा भेट्नेछिन् । त्यसलगत्तै ११ः३० मा प्रधानमन्त्री प्रचण्ड र भारतीय समकक्षी नरेन्द्र मोदीबीच हैदराबाद हाउसमा द्विपक्षीय भेटवार्ता हुनेछ।
शुक्रबार नै भारतीय वित्तमन्त्री अरुण जेट्ली, भारतीय विद्युत्मन्त्री पीयूष गोयललाई ४ बजेपछि छुट्टा–छुट्टै प्रचण्डलाई राष्ट्रपति भवनमा भेट्नेछन्। प्रम प्रचण्डले भारतीय राष्ट्रपति प्रणव मुखर्जीलाई साँझ ६ बजे भेट्ने कार्यक्रम तय गरिएको छ। सम्भव रहेसम्म भारतीय व्यापारीहरूसँग पनि प्रम दाहालले शुक्रबार नै भेट्दैछन्।
१ सय १६ सदस्यीय टोलीको नेतृत्व गर्दै प्रधानमन्त्री प्रचण्ड बिहिबार अपरान्ह नयाँ दिल्ली पुगेका हुन्। प्रधानमन्त्री नेतृत्वको प्रतिनिधिमण्डलका सदस्यहरुमा परराष्ट्रमन्त्री प्रकाशशरण महत, भौतिक पूर्वाधार तथा यातायात व्यवस्थामन्त्री रमेश लेखक, अन्य सांसदलगायत छन् । भारत भ्रमण सकेर प्रधानमन्त्री दाहाल असोज २ गते स्वदेश फर्कने छन्।