न्युयोर्कमा तीनतले भवन भत्किँदा कम्तीमा दुई जनाको मृत्यु, ७ बालबालिकासहित १९ घाइते
Photo: Isaac N./ Unsplash
अमेरिकाको न्युयोर्क सहरस्थित ब्रुकलिनको फ्ल्याटबशमा बुधबार दिउँसो एक तीनतले भवन भत्किँदा कम्तीमा दुई जनाको मृत्यु भएको छ भने सात बालबालिकासहित १९ जना घाइते भएका छन्।
न्युयोर्क फायर डिपार्टमेन्टका अनुसार स्थानीय समय अनुसार अपराह्न ४ बजेपछि १३२१ फ्ल्याटबश एभिन्युमा रहेको उक्त भवन भत्किएर नजिकैको २६२५ बेडफोर्ड एभिन्युस्थित निर्माणाधीन स्थलमा खसेको थियो।
दुर्घटनामा घाइते भएकामध्ये चार जनाको अवस्था गम्भीर छ भने १२ जनाको अवस्था सामान्य रहेको छ। यस्तै, उद्धारकार्यमा खटिएका एक अग्निनियन्त्रक पनि सामान्य घाइते भएका छन्।
दुर्घटनालगत्तै २५० भन्दा बढी अग्निनियन्त्रक तथा आपत्कालीन उद्धारकर्मीहरू परिचालन गरिएका छन्। उद्धार टोलीले भग्नावशेषबाट धेरै मानिसलाई जीवितै निकालेका छन्, जसमा साँझ ६:३० बजेतिर जीवितै निकालिएकी एक महिला पनि छिन्। भग्नावशेषभित्र अरू मानिस च्यापिएको हुनसक्ने आशङ्कामा खोजी कार्य निरन्तर जारी राखिएको छ।
कमजोर संरचनाका कारण आसपासका अन्य भवनहरूसमेत जोखिममा परेकाले न्युयोर्क सहरको भवन निर्माण विभागका निरीक्षकहरूले तिनको स्थायित्व जाँच गरिरहेका छन्। प्रहरीले फ्ल्याटबश र बेडफोर्ड एभिन्यु वरपरका सडकहरू बन्द गर्दै सर्वसाधारणलाई उक्त क्षेत्रमा नजान आग्रह गरेको छ।
भत्किएको भवनको तल्लो तल्लामा व्यावसायिक पसल र माथिल्लो तल्लामा आवासीय अपार्टमेन्ट रहेको थियो। दुर्घटनाको स्पष्ट कारण खुलिनसके पनि घटनाका बेला नजिकै उत्खननको काम भइरहेको प्रारम्भिक जानकारी प्राप्त भएको छ। विस्थापित तथा प्रभावितहरूका लागि नजिकैको वाईएमसीएमा रेडक्रसले सहयोग केन्द्र स्थापना गरेको छ।
