कलंकी अन्डरपासको ४० प्रतिशत काम सकियो, निर्माण धमाधम (फोटो फिचर)

नेपाल डेस्क

प्रकाशित मिति : कार्तिक १५, २०७४ बुधबार

१५ कात्तिक, काठमाडौं । जुन २०१८ सम्ममा सञ्चालनमा ल्याउनेगरी कलंकी अन्डरपास निर्माण धमाधम अघि बढेको छ ।हालसम्म ४० प्रतिशत काम सकिएको छ ।

काठमाडौं चक्रपथ सुधार आयोजना प्रमुख ज्ञानेन्द्र झाका अनुसार, चिनियाँ कम्पनी सांघाई कन्स्ट्रक्सनले अन्डरपास निर्माण गरिरहेको छ । उक्त खण्डको पाइलिङको हालै सकिएको छ ।

कलंकी–बल्खु खण्डमा अहिले कंक्रिटाइजेसनको काम भइरहेको छ । माटो हटाउने काम धमाधम छ भने स्ल्याब राखिसकिएको छ ।

जुलाई २०१८ अघि नै काम सक्ने लक्ष्य चिनियाँ कम्पनीको छ । उक्त योजना चीन सरकारकै सहयोगमा निर्माणाधीन छ ।

आठ सय मिटर लामो अन्डरपासमध्ये अहिले बल्खुतर्फ अधिकांश काम सकेर सीतापाइलातर्फको निर्माणमा तीव्रता दिइएको छ ।

आयोजना प्रमुख झाका २० दिनयता चिनियाँ कम्पनीले काममा तीव्रता दिएको हो । ‘तर, समय सीमामा काम सक्न कामदार थप्न जरुरी छ,’ उनले भने, ‘कामदार थप भनिरहेका छौं ।’

बल्खु खसीबजारबाट आएका सवारी साधनलाई सोही मार्गबाट सीतापाइलासम्म पुग्ने व्यवस्था मिलाइन लागेको हो । खसीबजारबाट थानकोट र सोल्टीमोडतर्फ जाने सवारीले भने हाल सञ्चालनमा रहेको सडक नै प्रयोग गर्नुपर्ने छ ।

थानकोट–कालीमाटी ओहोरदोहोर गर्ने सवारी साधनहरु अन्डरपासको माथिबाट गुड्नेछन् । यसको निर्माण बाँकी छ ।

सुस्त भयो तर रोकिएन

चिनियाँ कम्पनीले निर्माण थाल्दा वर्षात्मा पूर्ण रुपमा रोक्ने बताएको थियो ।

आयोजना प्रमुख झाका अनुसार वर्षात्मा पूर्ण रुपमा काम रोकिएन । उनले भने, ‘काम सुस्त भएको थियो, २० दिनयता फेरि तीव्रता आएको छ ।’

विनासकारी भूकम्प र भारतको नाकाबन्दीका कारण यसको निर्माण एक वर्षपछि धकेलिएको थियो । सुरुवातको सम्झौतामा जनवरी २०१७ मै काम सकिने उल्लेख थियो ।

यस्तो हुन्छ फाइदा

उपत्यकाबाट बाहिरिँदा होस् या भित्रिँदा, अहिले कलंकीको जाममा फस्नु पर्छ । एक घण्टाको जाम त कलंकीमा सामान्यजस्तै छ । तर, अन्डरपास निर्माण भएसँगै यो समस्या हट्ने छ ।

अहिले थानकोटबाट आउने सवारी साधन कालीमाटीतर्फ जान र बल्खुबाट आएका साधन सीतापाइलातर्फ मोडिँदा ट्राफिक जाम हुने गर्छ ।

दुवैतर्फबाट आउने साधनले एउटै सडक प्रयोग गर्नुपर्दाको बेफाइदा हो यो । अन्डरपासमार्फत् थानकोटबाट कालीमाटी जानेआउने सवारी साधन बिनाजाम निर्वाध गन्तव्यतर्फ जान पाउने छन् ।