अमेरिकाको फिलाडेल्फियामा ‘आइस आउट’ कानून, संघीय अध्यागमन सहकार्यमा कडा सीमा
फोटो : टिन्गी इन्जुरी ल फर्म
अमेरिकाको पेन्सिलभेनियास्थित फिलाडेल्फियाकी मेयर चेरेल पार्करले नगर प्रशासन र प्रहरीलाई संघीय अध्यागमन अधिकारीहरूसँगको सहकार्यमा सीमा तोक्ने ‘आइस आउट’ नामक विधेयकहरूको प्याकेजमा हस्ताक्षर गरेकी छन्।
बिहीबार सातमध्ये ६ वटा विधेयकमा हस्ताक्षर गरेसँगै ती अब औपचारिक रूपमा कानून बनेका छन्। एउटा विधेयकमा उनले हस्ताक्षर नगरे पनि भिटो नगरेकाले उक्त प्रस्ताव स्वतः लागू भएको बताइएको छ।
नयाँ कानूनअनुसार संघीय अध्यागमन अधिकारीहरूले नगरको सम्पत्ति प्रयोग गर्न पाउने छैनन् भने फिलाडेल्फिया प्रहरी डिपार्टमेन्टले ‘२८७ (जी)’ सम्झौतामार्फत अमेरिकी इमिग्रेसन एन्ड कस्टम्स इन्फोर्समेन्ट (आइस)सँग गर्ने सहकार्यमा कडा सीमा तोकिएको छ। साथै, नगर प्रशासनले व्यक्तिको नागरिकता वा अध्यागमन अवस्थासम्बन्धी विवरण कसरी संकलन गर्ने र प्रयोग गर्ने भन्ने विषयमा पनि नयाँ प्रतिबन्धहरू लागू गरेको छ।
नगर प्रशासनका अनुसार यी कदम आप्रवासी समुदायको सुरक्षा, गोपनीयता र अधिकारलाई थप सुदृढ बनाउन लक्षित छन्।
मेयर पार्करले हस्ताक्षर गर्न अस्वीकार गरेको विधेयक नम्बर २६००६० मा कानून कार्यान्वयन अधिकारीहरूले आफ्नो परिचय लुकाउन नपाउने तथा परिचयपत्र अनिवार्य रूपमा प्रदर्शन गर्नुपर्ने व्यवस्था समेटिएको थियो। नगर अधिवक्ता रेनी गार्सियाले उक्त प्रस्तावले संघीय तथा राज्यस्तरीय अधिकारीहरूको कार्यशैली नियन्त्रण गर्न खोज्ने भएकाले कानूनी जटिलता निम्त्याउन सक्ने बताएका छन्।
उनका अनुसार क्यालिफोर्नियामा यस्तै प्रकृतिको कानून हालै अमेरिकी संविधानविपरीत ठहर गरिएको थियो। साथै, प्रहरीको भेष धारण गर्नु पहिले नै गैरकानूनी रहेको विषय पनि उनले स्पष्ट पारे।
यता इमिग्रेसन एन्ड कस्टम्स इन्फोर्समेन्ट (आइस)ले भने फिलाडेल्फियाको कदमको आलोचना गरेको छ। आइसले जारी गरेको विज्ञप्तिमा स्थानीय राजनीतिज्ञहरूले सहकार्यमा अवरोध पुर्याउँदा अपराधीहरूलाई पक्राउ गर्न कठिन हुने तथा यसले समुदायमा अझ बढी दृश्य उपस्थितिसहित कारबाही गर्नुपर्ने अवस्था सिर्जना हुने उल्लेख गरिएको छ।