युएईमा इरानी आक्रमण : सशस्त्र बलका दुई सदस्यसहित हालसम्म ज्यान गुमाउने ११ जना पुगे
प्रकाशित मिति : १७ चैत्र २०८२, मंगलबार
फाइल । संयुक्त अरब इमिरेट्सको दुबईमा इरानी हमलापछि शारजाह शहरको औद्योगिक क्षेत्रको गोदामबाट निस्किएको धुवाँको कालो मुस्लो । तस्वीर स्रोत : अल्ताफ कादरी/एपी-रासस
संयुक्त अरब इमिरेट्स (युएई)को हवाई रक्षा प्रणालीले मार्च ३१ (मंगलबार) इरानबाट प्रक्षेपित नयाँ मिसाइल र ड्रोनको लहरलाई सफलतापूर्वक रोक्न सफल भएको छ। युएईको रक्षा मन्त्रालयका अनुसार ८ ब्यालेस्टिक मिसाइल, चार क्रूज मिसाइल र ३६ ड्रोनलाई सक्रिय रूपमा नष्ट गरिएको हो ।
अधिकारिक तथ्यांकअनुसार इरानबाट भएका पछिल्ला आक्रमणदेखि रोकिएका प्रक्षेप्यहरूको कुल संख्या ४३३ ब्यालेस्टिक मिसाइल, १९ क्रूज मिसाइल र १,९७७ ड्रोन पुगेको छ।
अधिकारीहरूका अनुसार आक्रमणमा युएई सशस्त्र बलका दुई सदस्यहरूको आफ्नो राष्ट्रिय कर्तव्य पालन गर्दै गर्दा मृत्यु भएको छ। साथै, सेनासँग काम गर्ने मोरोक्कोका एक नागरिक ठेकेदारको मृत्यु भएको छ। यसैगरी, हालसम्म एक नेपाली नागरिकसहित विभिन्न राष्ट्रियताका आठ नागरिकले ज्यान गुमाएका छन् ।
कुल १८८ जना घाइते भएका छन्, जसको चोट सामान्यदेखि गम्भीरसम्म रहेका छन्। घाइतेहरूको राष्ट्रियता पनि धेरै विविध रहेको छ। घाइतेमध्ये युएई, इजिप्ट, सुडान, इथियोपिया, फिलिपिन्स, पाकिस्तान, इरान, भारत, बंगलादेश, श्रीलंका, अजरबैजान, यमन, युगान्डा, इरिट्रिया, लेबनन, अफगानिस्तान, बहराइन, कोमोरस, टर्की, इराक, नेपाल, नाइजेरिया, ओमान, जोर्डन, प्यालेस्टाइन, घाना, इन्डोनेसिया, स्विडेन र टुनिसियाका नागरिकहरू छन्।
रक्षा मन्त्रालयले देशको संप्रभुता, सुरक्षा र स्थिरतालाई जोगाउन कुनै पनि खतरा सामना गर्न पूर्ण रूपमा तयार रहेको जनाएको छ। मन्त्रालयले आवश्यक सबै कदम चाल्दै देशको सुरक्षा, स्थिरता र नागरिकको संरक्षण सुनिश्चित गर्ने प्रतिबद्धता दोहोर्याएको छ।