सिरियामा ड्रोन आक्रमण : इराकसँगको सीमाना नजिकका सैन्य आधारहरू निशानामा, चुलियो तनाव
प्रकाशित मिति : १६ चैत्र २०८२, सोमबार
इराकको अन्बर प्रान्तस्थित हब्बनियाह सैन्य अड्डामा हवाई आक्रमणपछि भएको क्षति । तस्वीर : अली जबर/एपी-रासस
सिरियाली सेनाले इराकी सीमाना नजिक रहेका आफ्ना विभिन्न सैन्य आधारहरूमा ड्रोन आक्रमण भएको सोमबार पुष्टि गरेको छ। पछिल्लो एक महिनामा अमेरिका र इजरायलले इरानमाथि गरेको आक्रमणपछि मध्यपूर्व क्षेत्रमा युद्धको अवस्था सिर्जना भएको छ । युद्ध सुरु भएयता सिरियाली लक्ष्यमा यस्ता आक्रमण विरलै भएका थिए।
सिरियाको राजधानी दमास्कसले क्षेत्रीय द्वन्द्वबाट आफूलाई टाढा राख्ने प्रयास गरिरहेको भए पनि छिमेकी देशहरू यस संघर्षमा तानिँदै गएका छन्। विशेषगरी लेबनानमा सशस्त्र समूह हिजबुल्लाह र इजरायली सेनाबीच भीषण भिडन्त जारी छ। त्यस्तै, इराकमा इरान समर्थित समूहहरूले लगातार ड्रोन तथा रकेट आक्रमण गरिरहेका छन्।
सिरियाली सरकारी सञ्चारमाध्यममार्फत जारी विज्ञप्तिमा अधिकांश ड्रोनहरू आकाशमै खसालिएको दाबी गरिएको छ। यद्यपि, ती ड्रोनहरू कहाँबाट आएका थिए भन्ने विषयमा स्पष्ट जानकारी दिइएको छैन। सेनाले अहिले सम्भावित प्रतिकारका विकल्पहरूबारे समीक्षा गरिरहेको जनाएको छ।
पूर्वी सिरियाका सहायक रक्षा मन्त्री सिपान हामोका अनुसार आइतबार इराकबाट आएका चारवटा ड्रोनहरूले उत्तरपूर्वी सिरियामा रहेको अमेरिकी फौज तैनाथ आधारलाई निशाना बनाएका थिए । तर, ती सफलतापूर्वक अवरोध गरिएको थियो।
उनले एक्समार्फत जारी वक्तव्यमा भनेका छन्, “हामी यस घटनाका लागि इराकलाई जिम्मेवार ठान्छौं । यस्ता आक्रमण पुनः नदोहोरोस् भनेर आवश्यक कदम चाल्न आग्रह गर्छौं।”
यसै महिनाको सुरुवातमा सिरियाले लेबनानसँगको पश्चिमी र इराकसँगको पूर्वी सीमामा हजारौँ सैनिक तैनाथ गरेको थियो। रक्षा मन्त्रालयका अनुसार यो कदम बढ्दो क्षेत्रीय द्वन्द्वबीच सीमा सुरक्षा मजबुत बनाउने उद्देश्यले चालिएको हो।
पछिल्लो एक महिनामा रकेट अवरोध गर्दा निस्किएका टुक्राहरू सिरियाका विभिन्न भागहरूमा खसेका छन्, जसले सर्वसाधारणमा त्रास बढाएको छ।