इरानको नेतृत्व सम्हाल्न खोज्नेहरू मारिन सक्ने ट्रम्पको दाबी
प्रकाशित मिति : २० फाल्गुन २०८२, बुधबार
फोटो: एपी/रासस
अमेरिकी राष्ट्रपति डोनाल्ड ट्रम्पले इरानसँगको युद्धको प्रारम्भिक दिनमै ठूलो सफलता मिलेको बताएका छन्। ह्वाइट हाउसमा आयोजित एक कार्यक्रममा उनले भने, “युद्धको मोर्चामा हामीले निकै राम्रो गरिरहेका छौँ। यदि १० अङ्कको मापनमा मूल्याङ्कन गर्ने हो भने, म यसलाई १५ अङ्क दिन्छु।”
उनले इरानका क्षेप्यास्त्र प्रणालीहरू तीव्र गतिमा नष्ट भइरहेको समेत बताए। “इरानका क्षेप्यास्त्रहरू छिटो ध्वस्त पारिँदै छन् र उनीहरूका प्रक्षेपकहरू पनि नष्ट भइरहेका छन्,” ट्रम्पले थपे।
ट्रम्पले इरानले आफ्ना छिमेकी मुलुकहरूमा पनि आक्रमण गरिरहेको स्वीकार गरे तापनि त्यसबारे विस्तृत टिप्पणी भने गरेनन्। उनका अनुसार इरान अहिले “नियन्त्रण बाहिरको राष्ट्र” जस्तो देखिएको छ।
इरानका शीर्ष नेताहरू मारिएपछि अबको नेतृत्व कसले सम्हाल्ने भन्ने विषयमा आफूले स्पष्ट धारणा बनाइनसकेको संकेत गर्दै ट्रम्पले भने, “उनीहरूको नेतृत्व निकै छिटो समाप्त हुँदैछ। नेतृत्व गर्न चाहने जो-कोही पनि अन्ततः मारिने सम्भावना देखिन्छ।”
यसैबीच, इजरायली सेनाले इरानको राजधानी तेहरानमा फेरि ठूलो मात्रामा हवाई आक्रमण सुरु गरेको जनाएको छ। इजरायली रक्षा बल का अनुसार यी आक्रमणहरू इरानी शासनसँग सम्बन्धित “सैन्य पूर्वाधार” लाई लक्षित गरी गरिएका हुन्।
इजरायली सेनाले यसअघि पनि अर्को चरणको आक्रमण गरेको थियो। आईडीएफका अनुसार ती आक्रमणहरूमा इरानको पश्चिमी तथा केन्द्रीय क्षेत्रमा रहेका दर्जनौँ ब्यालिस्टिक क्षेप्यास्त्र प्रणालीसँग सम्बन्धित संरचनाहरू ध्वस्त पारिएका छन्।
सेनाले केही क्षेप्यास्त्र प्रक्षेपकहरू इरानी सैन्यकर्मीहरूले इजरायलतर्फ प्रहार गर्न तयारी गरिरहेकै अवस्थामा नष्ट गरिएको दाबी गरेको छ।
इजरायलका अनुसार यो नयाँ हवाई आक्रमण फेब्रुअरी २८ यता इरानमाथि गरिएको ११औँ चरणको आक्रमण हो। आईडीएफका प्रवक्ताले इरानी शासनमाथि निकै शक्तिशाली प्रहार गरिएको बताएका छन्।