‘स्टेट अफ द युनियन’मा ट्रम्पले दोहोर्याए शेयर बजारको उपलब्धि, अवकाश बचतमा सरकारी योगदानको घोषणा
प्रकाशित मिति : १३ फाल्गुन २०८२, बुधबार
फेब्रुअरी २४, २०२६ मा वाशिंगटन डीसीस्थित अमेरिकी क्यापिटलको हाउस चेम्बरमा स्टेट अफ द युनियन सम्बोधन गर्ने क्रममा अमेरिकी राष्ट्रपति डोनाल्ड ट्रम्प । तस्वीर : ब्रेन्डन स्मियालोव्स्की/एएफपी-रासस
अमेरिकी राष्ट्रपति डोनाल्ड ट्रम्पले मंगलबार आफ्नो ‘स्टेट अफ द युनियन’ सम्बोधनमा दोस्रो कार्यकाल जितेपछि शेयर बजारले ५३ वटा कीर्तिमानी उच्च स्तर बनाएको दाबी गर्दै कामदारहरूको अवकाश बचतमा सरकार आफैंले योगदान गर्ने योजना घोषणा गरेका छन्।
राष्ट्रपति ट्रम्पले व्यापक रूपमा प्रयोग हुने ४०१ (के) अवकाश बचत खाताहरू उल्लेख गर्दै शेयर बजारको मजबुत प्रदर्शनका कारण नागरिकहरूको बचत उल्लेखनीय रूपमा बढेको बताए। उनले रोजगारदाताबाट योगदान सुविधा नपाउने “बिर्सिएका अमेरिकी कामदारहरू” का लागि आगामी वर्षदेखि ४०० (के) खातामा कर्मचारीले गर्ने योगदानमध्ये प्रत्येकलाई अधिकतम १,००० डलरसम्म सरकारले मिलान गर्ने योजना ल्याइने जानकारी दिए। यद्यपि, कार्यक्रमको विस्तृत कार्यविधि भने सार्वजनिक गरिएको छैन।
लगानीकर्ताहरू हालैका महिनाहरूमा बजार अस्थिरताबाट प्रभावित भइरहेका बेला यो घोषणा आएको हो। कृत्रिम बुद्धिमत्तासम्बन्धी कम्पनीहरूको उच्च मूल्याङ्कन र अमेरिकी व्यापार नीतिको अनिश्चितताले वाल स्ट्रिटमा उतारचढाव बढाएको विश्लेषकहरू बताउँछन्।
गत साता अमेरिकी सर्वोच्च अदालतले ट्रम्प प्रशासनले आपतकालीन अधिकारअन्तर्गत लगाएका ट्यारिफहरू खारेज गरेपछि, राष्ट्रपति ट्रम्पले १० प्रतिशत ट्यारिफ १५० दिनसम्म लागू रहने आदेशमा हस्ताक्षर गरेका थिए। त्यसपछि उनले दर १५ प्रतिशतसम्म बढाउन सकिने संकेत दिएका छन्।
ट्रम्पले आफ्नो सम्बोधनमा “झण्डै सबै” देश र कम्पनीहरूले अमेरिकासँग भएका ट्यारिफ तथा लगानी सम्झौतामा कायम रहन चाहेको दाबी गरे।
इतिहासतः ‘स्टेट अफ द युनियन’ सम्बोधनले वित्तीय बजारमा सीमित प्रभाव पार्ने गरेको छ, किनकि यस्ता भाषणहरू प्रायः सत्तारूढ राष्ट्रपतिले आफ्ना उपलब्धि प्रस्तुत गर्ने र आगामी नीतिगत प्राथमिकता सार्वजनिक गर्ने मञ्चका रूपमा लिइन्छन्।