अमेरिकामा ‘ब्ल्याक फ्राइडे’मा अनलाइन किनमेलको नयाँ रेकर्ड, उपभोक्ताले गरे ११ दशमलव ८ बिलियन खर्च
प्रकाशित मिति : मंसिर १३, २०८२ शनिबार
अमेरिकी उपभोक्ताहरूले यस वर्षको ब्ल्याक फ्राइडेमा अनलाइन किनमेलमा ११ दशमलव ८ बिलियन डलर खर्च गरी नयाँ रेकर्ड कायम गरेका छन्। एडोब एनालिटिक्सको तथ्याङ्क अनुसार यो रकम गत वर्षको तुलनामा ९ दशमलव १ प्रतिशतले वृद्धि भएको हो।
एडोबले अमेरिकाका एक ट्रिलियनभन्दा बढी खुद्रा साइटहरूको गतिविधि विश्लेषण गर्ने क्रममा उपभोक्ताहरूले शनिबार ५ दशमलव ५ बिलियन डलर र आइतबार ५ दशमलव ९ बिलियन डलर खर्च गर्ने अनुमान गरेको छ। यी दुवै दिनको खर्च क्रमशः गत वर्षभन्दा ३ दशमलव ८ प्रतिशत र ५ दशमलव ४ प्रतिशतले बढी हुने अपेक्षा गरिएको छ।
यस्तै, सफ्टवेयर कम्पनी सेल्सफोर्सले यस वर्ष ब्ल्याक फ्राइडेका दिन अमेरिकन ग्राहकहरूले १८ बिलियन डलर खर्च गरेको बताएको छ, जुन गत वर्षको तुलनामा ३ प्रतिशतले वृद्धि हो। विलासी कपडा, जुत्ता तथा अन्य लक्जरी सामानहरू सबैभन्दा लोकप्रिय वस्तु बनेका छन्।
उपभोक्ताहरूले यस वर्ष पनि ब्ल्याक फ्राइडेमा बढी खर्च गरे पनि, मूल्यवृद्धिका कारण अनलाइन मागमा केही कमी आएको सेल्सफोर्सको विश्लेषणले देखाएको छ। उपभोक्ताहरूले चेकआउटमा गत वर्षको तुलनामा कम वस्तुहरू किनेका छन्।
भौतिक पसलहरूमा भने, थ्याङ्क्सगिभिङपछि बिहानको ‘बार्गेन हन्टिङ’ सामान्यजस्तै रह्यो। निरन्तर बढिरहेको मुद्रास्फीति, व्यापार नीतिसम्बन्धी अनिश्चिता र कमजोर श्रम बजारका कारण धेरै उपभोक्ताहरूले अधिक खर्च हुने चिन्ता व्यक्त गरे।
अब आउने साइबर मन्डे, यस वर्ष पनि सबैभन्दा ठूला अनलाइन किनमेलको दिन रहने अपेक्षा गरिएको छ। एडोबका अनुसार साइबर मन्डेमा अनलाइन खर्च १४ दशमलव २ बिलियन डलर हुने अनुमान छ, जुन गत वर्षभन्दा ६ दशमलव ३ प्रतिशतले बढी हो।