अमेरिकी राष्ट्रपति ट्रम्प र न्युयोर्कका नवनिर्वाचित मेयर माम्दानीबीचको भेटमा के भयो?
प्रकाशित मिति : मंसिर ५, २०८२ शुक्रबार
राष्ट्रपति डोनाल्ड ट्रम्प र न्युयोर्कका नवनिर्वाचित मेयर जोहरान माम्दानीबीच शुक्रबार व्हाइट हाउसमा पहिलो पटक भेटवार्ता भएको छ।
ओभल अफिसमा पत्रकारहरूले सोधेको प्रश्नको जवाफ दिँदै राष्ट्रपति ट्रम्प र मेयर माम्दानी दुवैले भेटलाई फलदायी भएको बताएका थिए। राष्ट्रपतिले न्युयोर्कवासीका लागि अपराध र जीवनयापनको लागत जस्ता विषयमा मेयरमा निर्वाचित माम्दानीसँग मिलेर काम गर्न चाहेको बताए।
न्युयोर्क सिटीलाई दिइने सङ्घीय कोष कटौती गर्ने आफ्नो धम्कीका बारेमा सोधिएको प्रश्नमा ट्रम्पले मेयरमा निर्वाचित माम्दानीलाई चोट पुर्याउनुको सट्टा मद्दत गर्ने अपेक्षा राखेको स्पष्ट पारेका थिए।
माम्दानी र ट्रम्प दुवैले धेरै विषयमा फरक मत रहेको स्वीकार गरे तापनि न्युयोर्कवासीहरूलाई सहयोग गर्ने विषयमा केही कुरामा सहमत भएका थिए। राष्ट्रपतिले उनीहरू आफ्ना मतभेदहरू मिलाएर अघि बढ्ने उल्लेख गर्दै माम्दानीले वास्तवमै उत्कृष्ट काम गर्न सक्ने विश्वास व्यक्त गरे।
न्युयोर्क सिटीले राष्ट्रपति ट्रम्पलाई माया गर्छ कि गर्दैन भनेर पत्रकारहरूले सोधेको प्रश्नमा माम्दानीले प्रश्नलाई पन्छाउँदै न्युयोर्क सिटीले सस्तो भविष्यलाई माया गर्ने जवाफ दिएका थिए।
माम्दानीले भने, “म तपाईंलाई भन्न सक्छु कि जीवनयापनको लागतमा केन्द्रित भएकाले गर्दा नै पछिल्लो राष्ट्रपति चुनावमा धेरै न्युयोर्कवासीले राष्ट्रपति ट्रम्पलाई भोट दिएका थिए। र म त्यो सस्तोपनको एजेन्डामा सफल हुन सँगै काम गर्न उत्सुक छु।”
यही एजेन्डाले जीवनयापनको सङ्कटबाट गुज्रिरहेका र एक चौथाइ गरिबीमा बाँचिरहेका साढे ८० लाख मानिसको जीवन परिवर्तन गर्न सक्ने माम्दानीले बताए।
राष्ट्रपति ट्रम्पले शुक्रबार पत्रकारहरूसमक्ष माम्दानीको प्रशंसा समेत गरेका थिए। ट्रम्पले भने, “मलाई लाग्छ कि उनी फरक छन्, र त्यो धेरै सकारात्मक तरिकामा हुन सक्छ। मलाई लाग्छ उनी तपाईंको सामान्य व्यक्ति, दौडने, जित्ने, मेयर बन्ने भन्दा फरक छन्। न्युयोर्कका लागि साँच्चै उनीसँग राम्रो काम गर्ने मौका छ।”
राष्ट्रपतिले माम्दानी ‘सामान्य उम्मेदवार’ भन्दा फरक रहेको औँल्याए। ट्रम्पले थपे, “उनले कसैले अपेक्षा नगरेको प्राइमरी चुनाव जिते। यो ठूलो सम्मान हो। म उनका लागि खुसी हुनेछु।”
न्युयोर्कको गभर्नरका लागि दौडिरहेकी रिपब्लिकन प्रतिनिधि एलिस स्टेफानिकले माम्दानीलाई ‘जिहादी’ भनेको कुरामा उनी सहमत छन् कि छैनन् भनेर ट्रम्पलाई सोधिएको थियो। ट्रम्पले आफू त्यसमा सहमत नभएको बताए। कहिलेकाहीँ चुनावी अभियानमा त्यस्ता कुराहरू भनिए पनि आफू त्यसमा सहमत नभएको ट्रम्पले स्पष्ट पारेका थिए।
ट्रम्पले माम्दानी धेरै तार्किक व्यक्ति भएको बताए र थपे, “मैले एक जना व्यक्तिलाई भेटें जसले न्युयोर्कलाई फेरि महान् भएको देख्न चाहन्छन्।”
राष्ट्रपति ट्रम्पले माम्दानीको नेतृत्वमा न्युयोर्क सिटीमा आफूलाई ‘धेरै सहज’ महसुस हुने बताए। न्युयोर्क सिटीमा बस्न सहज लाग्छ कि भनेर सोध्दा ट्रम्पले भने, “हो, लाग्छ — साँच्चै लाग्छ — विशेष गरी यो भेटपछि, पक्कै पनि। हामीले सोचेभन्दा धेरै कुरामा हामी सहमत छौं।”