नर्थ क्यारोलिनाको शार्लोटमा फेडेरल एजेन्टहरूको छापा : एकै दिन ८१ जना पक्राउ, समुदायमा त्रास
प्रकाशित मिति : मंसिर १, २०८२ सोमबार
अमेरिकी राष्ट्रपति डोनाल्ड ट्रम्प प्रशासनको सामूहिक निर्वासन अभियान तीव्र बन्दै जाँदा फेडेरल एजेन्टहरूले एकै दिन ८१ जनालाई पक्राउ गरेका छन्। अमेरिकी बोर्डर पेट्रोलका वरिष्ठ अधिकारी ग्रेगरी बोभिनोका अनुसार शनिबार नर्थ क्यारोलिनाको शार्लोट शहरमा एकै दिन ८१ जना आप्रवासी पक्राउ परेका हुन् ।
बोभिनोका अनुसार शार्लोटमा पहिलो दिनमै गरिएको व्यापक छापामा समातिएका धेरै व्यक्तिहरूको “महत्वपूर्ण आपराधिक र आप्रवासन इतिहास” रहेको दाबी गरिएको छ। तर, बोर्डर पेट्रोल, इमिग्रेसन एण्ड कस्टम्स एन्फोर्समेन्ट (आइस) तथा अमेरिकी डिपार्टमेन्ट अफ होेमल्याण्ड सेक्युरिटीले यसबारे कुनै आधिकारिक टिप्पणी दिएका छैनन्।
ट्रम्प प्रशासन सत्तामा आएपछि अमेरिकी सहर–सहरमा कडा आप्रवासन कार्यान्वयन गर्दै आएकाले डेमोक्र्याटहरूले नेतृत्व गरेका सहरहरूमा विशेष गरी तनाव बढेको छ। यसले धेरै स्थानमा स्थानीय नागरिक र फेडेरल आप्रवासन एजेन्टहरूबीच प्रत्यक्ष सामना भएको छ।
नर्थ क्यारोलिनाका गभर्नर जोश स्टाइनले आइतबार राति सार्वजनिक गरेको भिडियो सन्देशमा अवैध तथा हिंसात्मक अपराधीहरूको निर्वासन आवश्यक भए पनि शार्लोटमा फेडेरल एजेन्टहरूले गरेको कार्यले समुदायमा त्रास फैलाएको आरोप लगाएका छन् । उनले भनेका छन्, “अनुहार ढाकेका, भारी हतियारबन्द एजेन्टहरू गाडीमा आएर छालाको रङका आधारमा अमेरिकी नागरिकलाई लक्षित गरिरहेका छन्। पार्किङ लट, सडक, चर्च र पसलबाट अनियमित रूपमा मानिस समातिएको रिपोर्ट आएको छ ।”
उनले थपे, “क्रिसमस ट्री सजाउँदै गरेका बगैँचा कामदारलाई पछ्याउने, धार्मिक स्थलमा छिरेर मानिस समात्ने जस्ता कार्यहरूले समुदायलाई सुरक्षित बनाउने होइन, विभाजित बनाइरहेको छ।”