ह्वाइट हाउसमा पत्रकारहरूको स्वतन्त्र पहुँचमा कडाइ, नयाँ नियम लागू
प्रकाशित मिति : कार्तिक १५, २०८२ शनिबार
ह्वाइट हाउसले पत्रकारहरूका लागि नयाँ कडा नियम लागू गरेको छ । नयाँ नियमअन्तर्गत प्रेस सेक्रेटरी क्यारोलीन लेभिट र अन्य उच्च सञ्चार अधिकारीहरूको कार्यालयमा पूर्व स्वीकृतिबिना प्रवेश गर्न प्रतिबन्ध लगाइएको छ। यो कार्यालय ओभल अफिसको नजिकै, वेस्ट विङमा अवस्थित छ।
राष्ट्रिय सुरक्षा परिषद्ले जारी गरेको नयाँ नीतिअनुसार ‘अप्पर प्रेस’ भनेर चिनिने कक्ष १४० मा अब पत्रकारहरूले पूर्वनिर्धारित भेटघाटबिना प्रवेश गर्न पाउने छैनन्। यो उपाय संवेदनशील सामग्रीको सुरक्षाका लागि गरिएको जनाइएको छ ।
यसअघि रक्षा मन्त्रालयले पनि पत्रकारहरूको पहुँचमा कडाइ गरेको थियो, जसका कारण धेरै पत्रकारहरूले पेन्टागन छोडेर आफ्नो प्रेस पास फिर्ता गरेका थिए। ह्वाइट हाउसले भने आफ्नो नीति परिवर्तन पत्रकारहरूले गोप्य रूपमा अडियो–भिडियो रेकर्ड गर्ने, संवेदनशील जानकारी चित्रण गर्ने लगायतका गतिविधि रोक्नका लागि गरिएको बताएको छ।
यसबारे ह्वाइट हाउस कोरेस्पोन्डेन्ट्स एसोसिएशनले कडा आपत्ति जनाएको छ । अध्यक्ष वेजिया जियाङले भनिन्, “यो कदमले पारदर्शितामा कमी ल्याउँछ । साथै, पत्रकारहरूको समाचार सङ्कलनको क्षमतालाई कमजोर पार्छ।”
सन् १९९३ मा क्लिन्टन प्रशासनले पनि यस्तै नियम लागू गरेको थियो । तर, आलोचनापछि फिर्ता लिइएको थियो।