मुक्तिनाथमा बन्ने ३५ फिट अग्लो विष्णु मूर्तिको ४०% काम सम्पन्न

डी. ढुंगाना

---

प्रकाशित मिति : कार्तिक ३, २०८२ सोमबार

मुस्ताङको वारागुङ मुक्तिक्षेत्र गाउँपालिकास्थित प्रसिद्ध तीर्थस्थल मुक्तिनाथमा ३५ फिट अग्लो विष्णु भगवानको मूर्ति निर्माण कार्य तीव्र गतिमा अगाडि बढेको छ । मूर्ति निर्माणको काम चालीस प्रतिशत सकिएको निर्माण कम्पनी अरनिको स्टोन कार्भिङका धर्मराज शाक्यले जानकारी दिए । यो मूर्ति निर्माण सम्पन्न भएपछि नेपालकै सबैभन्दा ठूलो विष्णु मूर्ति बन्ने छ ।

यो परियोजना तत्कालीन राष्ट्रपति विद्यादेवी भण्डारीले २०७९ मा उद्घाटन गरेकी थिइन् । मूर्ति निर्माणका लागि शेष घले दम्पतीले ३ करोड ५० लाख रुपैयाँ लगानी गरेका छन् । अर्को वर्षसम्म मूर्ति निर्माणको काम सम्पन्न हुनेछ । यो मूर्ति मुक्तिनाथ मन्दिर र सोनाम लामाले निर्माण गरेको बुद्ध मूर्तिको बीचमा रहनेछ । दुवै मूर्तिबीचको दूरी करिब दुई सय फिट छ । समुद्र सतहबाट ३,७१० मिटर उचाइमा रहेको यो स्थानबाट चारैतिर हिमालको मनोरम दृश्यावलोकन गर्न सकिन्छ ।

सोनाम लामा र शेष घलेले यो परियोजनाको नेतृत्व गरिरहेका छन् । लामाले यसअघि नै मुक्तिनाथमा करिब ६ करोड रुपैयाँको लगानीमा बुद्ध मूर्ति स्थापना गरिसकेका छन् ।

खसोखास निशुल्क सब्सक्राइब गर्नुहोस् 🙏

अब तपाईँले अमेरिकी भिसा, ग्रीनकार्ड लगायत सम्पूर्ण अध्यागमन अद्यावधिकहरू तथा आवास, कर, स्वास्थ्य सेवा लगायतका विषयमा सूचना र स्रोतहरू छुटाउनु पर्नेछैन। ती सबै सिधै तपाईँको इनबक्समा प्राप्त गर्नुहुनेछ।

इमेल ठेगाना यहाँ प्रविष्ट गर्नुहोस्…

सब्सक्राइब गर्न यहाँ क्लिक गर्नुहोस्

‘हिन्दु र बौद्ध धर्मावलम्बीहरूको साझा थलो मुक्तिनाथको धार्मिक, सांस्कृतिक र पर्यटकीय महत्वलाई थप उजागर गर्न विष्णु मूर्ति निर्माणको पहल गरेका हौँ,’ लामाले भने । विष्णु मूर्ति निर्माणका लागि आवश्यक ढुंगा चोभारबाट ल्याइएको छ । यसअघि स्थापना भएको बुद्ध मूर्तिमा पनि चोभारकै ढुंगा प्रयोग गरिएको थियो । मूर्ति निर्माणमा प्रत्यक्ष र अप्रत्यक्ष रूपमा २० जनाभन्दा बढी कालिगड संलग्न छन् । ३५ फिट अग्लो यो मूर्ति निर्माण सम्पन्न भएपछि मुक्तिनाथको धार्मिक र पर्यटकीय आकर्षण थप बढ्ने अपेक्षा गरिएको छ ।

मूर्ति स्थापनाका लागि मुक्तिनाथ विकास समितिले पनि सहयोग गरिरहेको लामाले बताए । मूर्ति स्थापनाका लागि गाउँपालिकाले समेत वडा अध्यक्ष र स्थानीयहरूसँग छलफल गरिरहेको लामाले सुनाए । समग्र परियोजना सम्पन्न गर्न करिब ९ करोड रुपैयाँ लाग्ने अनुमान गरिएको छ ।

मुक्तिनाथ विकास गुरु योजनाअन्तर्गत परम्परागत धार्मिक संरचनाको संरक्षण र सम्वद्र्धन गर्ने उद्देश्यले यो परियोजना अगाडि बढाइएको हो । हिन्दु र बौद्ध धर्मावलम्बीहरूको साझा आस्थाको केन्द्र मानिने मुक्तिनाथमा विश्वभरका पर्यटक र तीर्थयात्रीहरू आउने गर्छन् ।

विष्णु मूर्तिको स्थापनाले मुक्तिनाथको धार्मिक र पर्यटकीय महत्वलाई थप उजागर गर्ने उद्देश्यले यो परियोजना सुरु गरिएको घलेको भनाइ छ । यो परियोजनाले मुस्ताङको धार्मिक, सांस्कृतिक र पर्यटकीय सम्भावनालाई विश्वसामु चिनाउन महत्वपूर्ण योगदान पुर्याउने घले दम्पतीको विश्वास छ ।