हमासद्वारा थप ४ जना बन्धकको शव इजरायली सेनालाई फिर्ता

भवानी प्रसाद पाण्डे

---

प्रकाशित मिति : आश्विन २७, २०८२ मंगलबार

हमासले थप चार जना मृतक बन्धकका शवहरू इजरायली सेनालाई फिर्ता गरेको छ। रेडक्रसले ती शवहरूलाई कफिनमा राखेर मंगलबार राति ढिलो इजरायली सेनालाई बुझाएको हो।

हमासले बाँकी २८ मृतक बन्धकका शव फिर्ता नगरे, गाजामा मानवीय सहायता सीमित गरिने इजरायली सेनाले चेतावनी दिएपछि हमासले थप ४ जना मृतक बन्धकको शव हस्तान्तरण गरेको हो।

यसअघि, हमासले सोमबार २० जना जीवित र चार जना मृतक बन्धकहरू फिर्ता गरेको थियो। रेडक्रसका अनुसार, इजरायलले मंगलबार ४५ जना मृतक प्यालेस्टिनीहरूको शव गाजामा फिर्ता पठाएको थियो।

दुई वर्षपछि परिवारसँग पुनर्मिलन भएका बन्धकहरूका भावुक दृश्यहरूले इजरायलमा खुसी ल्याएको छ भने, प्यालेस्टिनीहरू पनि इजरायलबाट रिहा भएका कैदीहरूको स्वागतमा उत्सव मनाइरहेका छन्।

खसोखास निशुल्क सब्सक्राइब गर्नुहोस् 🙏

अब तपाईँले अमेरिकी भिसा, ग्रीनकार्ड लगायत सम्पूर्ण अध्यागमन अद्यावधिकहरू तथा आवास, कर, स्वास्थ्य सेवा लगायतका विषयमा सूचना र स्रोतहरू छुटाउनु पर्नेछैन। ती सबै सिधै तपाईँको इनबक्समा प्राप्त गर्नुहुनेछ।

इमेल ठेगाना यहाँ प्रविष्ट गर्नुहोस्…

सब्सक्राइब गर्न यहाँ क्लिक गर्नुहोस्

अमेरिकी राष्ट्रपति डोनाल्ड ट्रम्पको युद्धविराम योजना अनुसार ४८ जना सबै बन्धकको हस्तान्तरण सोमबार दिउँसोसम्म सम्पन्न हुने अपेक्षा गरिएको थियो। यद्यपि, सबै जीवित बन्धक फिर्ता भइसके पनि, अझै २० जना मृतक बन्धकका शव नआएकाले दुवै पक्षमाथि दबाब बढ्दै गएको छ।

इजरायली अधिकारीहरूले हमासले सम्झौता तोडेको कारण गाजामा राहत सामग्री प्रवेशमा प्रतिबन्ध लगाइएको र इजिप्टसँगको रफाह सीमा खोल्ने योजना स्थगित गरिएको बताएका छन्। अर्कोतर्फ, हमासले सबै शव पत्ता लगाउन कठिनाइ भोगिरहेको बताएको छ।

इजरायली सञ्चारमाध्यमले गत हप्ता प्रकाशित युद्धविराम सम्झौतामा हमास र अन्य समूहहरूले सबै शव तोकिएको समयमा पत्ता लगाउन नसक्ने सम्भावना रहन सक्ने उल्लेख गरेका थिए। इजरायली अधिकारीका अनुसार अब बाँकी शव फिर्ता गराउन अन्तर्राष्ट्रिय कार्यदल गठन गरिनेछ।

दुई वर्ष लामो युद्ध अन्त्यको रूपमा ट्रम्पको २० बुँदे शान्ति योजना अनुसार करिब २,००० प्यालेस्टिनी कैदी र बन्दीहरू रिहा भएका थिए। पहिलो चरण अन्तर्गत युद्धविराम अक्टोबर १० तारिख दिउँसो १२ बजे लागू भएको थियो। ट्रम्पले सोमबार इजिप्ट र कतारका नेताहरूसँग मिलेर उक्त घोषणा पत्रमा हस्ताक्षर गरेका छन्।

योजनाअनुसार गाजालाई प्रारम्भमा “शान्ति बोर्ड”को निगरानीमा रहने, स्वतन्त्र प्यालेस्टिनी प्राविधिक समितिले शासन गर्ने, र पछि सुधारपछि अधिकार प्यालेस्टिनी प्राधिकरणलाई हस्तान्तरण गरिनेछ।

गाजाको हमास–नियन्त्रित स्वास्थ्य मन्त्रालयका अनुसार, इजरायली आक्रमणबाट अहिलेसम्म ६७,८६९ जना प्यालेस्टिनी मारिएका छन्।