अमेरिका र चीनबीचको व्यापार युद्धविराम थप ९० दिनका लागि लम्बियो
प्रकाशित मिति : श्रावण २७, २०८२ मंगलबार
अमेरिका र चीनले आपसी व्यापार युद्ध रोक्ने सम्झौताको म्याद १० नोभेम्बरसम्मका लागि थप गरेका छन्।
संयुक्त विज्ञप्तिमा विश्वका यी दुई ठूला अर्थतन्त्रहरूले यस वर्षको सुरुमा घोषणा गरिएका एकअर्काका सामानमाथिका उच्च शुल्कहरूलाई थप ९० दिनका लागि निलम्बन गर्ने बताएका छन्।
गत महिनाको वार्तालाई दुवै पक्षले ‘रचनात्मक’ भनेका थिए। चीनका प्रमुख वार्ताकारले त्यसबेला युद्धविराम कायम राख्ने प्रतिबद्धता जनाएका थिए। अमेरिकी अधिकारीहरूले भने राष्ट्रपति डोनाल्ड ट्रम्पको अन्तिम स्वीकृतिको प्रतीक्षा गरिरहेको बताएका थिए।
राष्ट्रपति ट्रम्पले शुल्क युद्धविरामको अवधि बढाउने कार्यकारी आदेशमा हस्ताक्षर गरेका छन्। यसअनुसार, वाशिङ्टनले चिनियाँ सामानमाथि १४५ प्रतिशत शुल्क लगाउने योजना रोक्नेछ भने चीनले पनि अमेरिकी सामानमाथिको १२५ प्रतिशत शुल्क स्थगित राख्नेछ।
हालको सम्झौताअनुसार, अमेरिकाले चिनियाँ आयातमा ३० प्रतिशत शुल्क कायम राख्नेछ र चीनले अमेरिकी सामानमाथि १० प्रतिशत शुल्क कायम राख्नेछ।
ह्वाइट हाउसका अनुसार, शुल्क युद्धविरामको यो विस्तारले ‘व्यापार असन्तुलन समाधान’ र ‘असमान व्यापार अभ्यास’ बारे थप वार्ताका लागि समय दिनेछ।
२०२४ मा चीनसँगको अमेरिकी व्यापार घाटा करिब ३०० बिलियन डलर पुगेको थियो, जुन अहिलेसम्मकै सबैभन्दा ठूलो हो।
वार्ताको उद्देश्य अमेरिकी निर्यातकर्ताहरूका लागि चीनमा पहुँच बढाउने, राष्ट्रिय सुरक्षा र आर्थिक मुद्दाहरूलाई सम्बोधन गर्ने रहेको छ।
वाशिङ्टनस्थित चिनियाँ दूतावासका प्रवक्ताले भनेका छन्, “चीन र अमेरिकाबीचको जीत–जीत सहकार्य नै सही बाटो हो; दबाब र नियन्त्रणको बाटोले कतै पुर्याउँदैन।”
चीनले अमेरिकासँग ‘असंगत’ व्यापार प्रतिबन्धहरू हटाउन, दुवै पक्षका कम्पनीहरूलाई फाइदा हुने गरी सहकार्य गर्न र विश्व सेमिकन्डक्टर उत्पादनको स्थिरता कायम राख्न आह्वान गरेको छ।
अमेरिका–चीनबीचको व्यापार तनाव यस वर्ष अप्रिलमा उत्कर्षमा पुगेको थियो, जब ट्रम्पले विश्वका धेरै देशका सामानमाथि नयाँ शुल्क घोषणा गरेका थिए, जसमा चीनमाथि सबैभन्दा उच्च दर लागू गरिएको थियो।
यसैबीच, अमेरिका टिकटकलाई यसको चिनियाँ मालिक बाइटडान्सबाट अलग गर्न दबाब दिइरहेको छ, जसलाई चीनले भने अस्वीकार गरेको छ।