अमेरिकामा ममता काफ्ले हत्या अभियोगको सुनुवाइ अब एक वर्ष पछाडि
प्रकाशित मिति : श्रावण ४, २०८२ आईतबार
भर्जिनियाको प्रिन्स विलियम काउन्टीका न्यायाधीशले ममता काफ्लेको हत्या अभियोग र अन्य मुद्दाको सामना गरिरहेका उनका पति नरेश भट्टविरुद्धको मुद्दा एक वर्षभन्दा बढी समयका लागि सार्ने निर्णय गरेका छन्। मुद्दाको सुनुवाइ अब अक्टोबर ५, २०२६ मा तय गरिएको छ।
ममता काफ्लेका पति, ३८ वर्षीय नरेश भट्ट, अगस्ट २२, २०२४ देखि प्रिन्स विलियम काउन्टी जेलमा धरौटीबिना राखिएका छन्। उनलाई ममता काफ्लेको हत्या र उनलाई बेपत्ता बनाएको अभियोगमा पक्राउ गरिएको थियो।
नरेश भट्टको निर्णायक मण्डलको सुनुवाइ सुरुमा आगामी सेप्टेम्बरको सुरुमा हुने तय भएको थियो। तर, उनका वकिलले मुद्दामा सुनुवाइका लागि ढिलाइ गर्न निवेदन दायर गरेका थिए। मुद्दाको तयारीका लागि पर्याप्त समय लाग्ने भन्दै उनका वकिलले लामो समय मागेका थिए।
नरेश भट्टको संवैधानिक अधिकारलाई मान्यता दिँदै अभियोजन पक्षले पनि ढिलाइमा आपत्ति जनाएन। बचाउ पक्षलाई मुद्दाको तयारीको लागि पर्याप्त समय नदिएका कारण हुन सक्ने सम्भावित पुनरावेदनयोग्य मुद्दाहरूबाट बच्नका लागि समय प्रदान गर्न आपत्ति नजनाएको अभियोजन पक्षको भनाइ छ।
नरेश भट्टका वकिलले जुलाई २०२६ सम्मको लागि ढिलाइको अनुरोध गरे तापनि, अभियोजन पक्षले अक्टोबर २०२६ मा मुद्दाको सुनुवाइ गर्न आग्रह गरेको थियो। कार्यालयले सो समयसीमामा धेरै अन्य मुद्दाहरू पनि हेरिरहेको भन्दै अक्टोबरका लागि आग्रह गरिएको थियो।
२८ वर्षीया आमा र नर्स ममता काफ्ले गत वर्ष बेपत्ता भएकी थिइन्। उनी र नरेश भट्टको हाल १ वर्षीया छोरी छिन्, जसको हेरचाह उनको परिवारले गरिरहेको छ। ममता काफ्ले २०२१ मा नेपालबाट अमेरिका बसाइँ सरेकी थिइन्। उनी अन्तिम पटक जुलाई २७, २०२४ मा मनासासको युभीए प्रिन्स विलियम हेल्थ सेन्टरमा काम छोड्दा देखिएकी थिइन्।
उनको शव अझै भेटिएको छैन। तर, प्रहरी र अभियोजकहरूले बारम्बार उनी अब जीवित नभएको बताएका छन्। विगतमा अमेरिकी सेनामा काम गरेका नरेश भट्टले मुद्दाको सुनुवाइमा ढिलाइका लागि अदालतमा आफू सहमत भएको बताएका थिए।
सुनुवाइको समयमा ममता काफ्लेका धेरै आफन्त, साथीभाइ र समर्थकहरू अदालतमा उपस्थित थिए। उनीहरूले मुद्दा १४ महिनाभन्दा बढी ढिलाइ गर्ने निर्णयप्रति निराशा व्यक्त गरेका थिए।