इजरायली प्रधानमन्त्रीसँग यूरोपेली आयोगकी अध्यक्षको वार्ता, इरानसँगको तनावबारे के भनिन् ?
प्रकाशित मिति : असार २, २०८२ सोमबार
यूरोपेली आयोगकी अध्यक्ष उर्सुला भन डेर लायनले इरान–इजरायल तनाव समाधानका लागि वार्ता नै सबैभन्दा उपयुक्त उपाय भएको बताएकी छन्।
आइतबार इजरायली प्रधानमन्त्री बेन्जामिन नेतान्याहूसँग टेलिफोन वार्ता गर्दै उनले इरानसँग परमाणु हतियार नभएको सुनिश्चित गर्न संवादमार्फत समाधान खोज्न आग्रह गरिन्।
उनका अनुसार फोन वार्ताका क्रममा नेतन्याहू र आफू दुवै इरानसँग कुनै पनि हालतमा परमाणु हतियार हुन नहुने विषयमा सहमति भएका थिए । यस्तै, यो विषयमा कुनै शंका बाँकी नरहेको उनले बताइन्।
यद्यपि, उर्सुला भन डेर लायनले यसअघि गाजामा इजरायली सैन्य कारबाहीको आलोचना गरेकी थिइन्। उनले इजरायली आक्रमणबाट ठूलो मानवीय संकट उत्पन्न भएको भन्दै संयम अपनाउन आग्रह गरेकी थिइन्।
तर, यस पटक उनले भनिन्, “इरानले संयुक्त राष्ट्रसंघको परमाणु निगरानी संस्थाका नियमहरूको पालना नगरेको अवस्थाले इजरायललाई आफ्नो सुरक्षा सुनिश्चित गर्न कदम चाल्ने अधिकार दिन्छ।”
उनले स्पष्ट रूपमा भनिन्, “इरान नै हाल क्षेत्रीय अस्थिरताको मुख्य कारण हो। यसको व्यवहारले सम्पूर्ण मध्यपूर्व क्षेत्रमा तनाव सिर्जना गरिरहेको छ।”
उर्सुला भन डेर लायन हाल क्यानडाको क्युबेक प्रान्तमा आयोजित जी–७ सम्मेलनमा सहभागी छिन्। सम्मेलनमा प्रमुख विश्व नेताहरूबीच इरान–इजरायल द्वन्द्व, रुसको युक्रेनमाथिको आक्रमण, चीनसँगको रणनीतिक प्रतिस्पर्धा र जलवायु संकटजस्ता विश्वव्यापी चुनौतीहरूबारे छलफल हुँदैछ।
उनले जी–७ सम्मेलनका क्रममा युरोपेली संघको तर्फबाट स्पष्ट धारणा राख्ने बताउँदै भनिन्, “हामी संवाद र अन्तर्राष्ट्रिय नियमहरूको पालनामा विश्वास गर्छौं। कुनै पनि मुलुकले आणविक खतरा बढाउने गतिविधि गर्न सक्दैन।”
जी–७ सम्मेलनमा अमेरिका, क्यानडा, ब्रिटेन, फ्रान्स, इटली, जापान, जर्मनी र युरोपेली संघका प्रतिनिधिहरू सहभागी छन्। यो सम्मेलनमा इरानको आणविक गतिविधि, इजरायलको सुरक्षा अवस्था तथा युक्रेनमा जारी युद्धजस्ता विषयहरू प्राथमिकतामा राखिएका छन्।