इजरायली हमलामा इरानका मुख्य ग्यास डिपो र केन्द्रीय तेल प्रशोधन केन्द्र ध्वस्त
प्रकाशित मिति : जेष्ठ ३१, २०८२ शनिबार
फोटो : रासस
इजरायलले इरानमा गरेको पछिल्लो आक्रमणमा इरानको मुख्य ग्यास डिपो र केन्द्रीय तेल प्रशोधन केन्द्र ध्वस्त भएको छ । राजधानीभरि विस्फोट, धुवाँ र आगोको दृश्य देखिएको छ।
इरानको तेल मन्त्रालयले जारी गरेको वक्तव्यअनुसार राजधानीको उत्तर भागस्थित शाहरान इन्धन डिपोमा आक्रमण हुँदा भीषण आगलागी भएको हो ।
उक्त डिपोमा कम्तीमा ११ वटा भण्डारण ट्यांकी रहेका छन् । शाहरान इलाका उच्चवर्गीय आवासीय टावरहरूले भरिएको क्षेत्र हो।
त्यसैगरी, राजधानीको दक्षिण भागमा रहेको शाहर रे नामक तेल प्रशोधन केन्द्रमा पनि आक्रमण भएको पुष्टि गरिएको छ । यो केन्द्र इरानका सबैभन्दा ठूला तेल प्रशोधन केन्द्रहरूमध्ये एक हो ।
इरानका लागि ऊर्जा क्षेत्र अर्थतन्त्रको मेरुदण्ड हो । निर्यात आम्दानी र घरेलु ऊर्जा आपूर्तिको मुख्य आधार भएकाले यस क्षेत्रमा गरिएको आक्रमणलाई इजरायल–इरान द्वन्द्वमा ठूलो चरणका रूपमा हेरिएको छ।
इजरायलले पहिले नै दक्षिणी इरानको साउथ पर्स ग्यास फिल्डमा समेत हमला गरेको थियो । जुन विश्वकै सबैभन्दा ठूलो ग्यास क्षेत्रहरूमध्ये एक हो ।
इजरायली सुरक्षा अधिकारीहरूका अनुसार आक्रमणमा इरानका केही आणविक प्रयोगशालाहरू पनि लक्षित गरिएका छन् । यसबारे इजरायल सरकारले आधिकारिक टिप्पणी भने दिएको छैन ।
इरानको वाणिज्य चेम्बर अन्तर्गत ऊर्जा समितिका सदस्य हामिद होसेनीले शाहरान इन्धन डिपोलाई बर्सौंदेखि आवासीय क्षेत्रबाट सार्ने छलफल भइरहेको बताए ।
तेल मन्त्रालयका एक अधिकारीका अनुसार डिपोमा दैनिक ८ लाख लिटर ग्यासोलीन भण्डारण गरिन्छ । यो डिपोले इरानको तीन दिनसम्मको इन्धन आवश्यकता पूरा गर्न सक्ने क्षमता राख्छ।
तर शनिबारको हमलामा डिपोमा रहेका ट्यांकीहरू एकपछि अर्को विस्फोट हुँदा आसपासका आवासीय इलाकाहरू पनि गम्भीर जोखिममा परेका छन् ।
इजरायली सरकारले अहिलेसम्म आक्रमणबारे कुनै औपचारिक प्रतिक्रिया दिएको छैन । तर यी आक्रमणहरूले इरानमा मात्र होइन पुरै मध्यपूर्वमा तनाव अझ चर्कने देखिएको छ।
इरानको मुख्य ऊर्जा पूर्वाधारमा आक्रमणसँगै इजरायल र इरानबीचको द्वन्द्वले नयाँ खतरनाक मोड लिएको छ ।