भारतलाई सहयोगको प्रस्ताव गर्दै अमेरिकी राष्ट्रपति ट्रम्पले भने – ‘विमान दुर्घटना भयावह’
प्रकाशित मिति : जेष्ठ २९, २०८२ बिहीबार
Trump
भारतको गुजरात राज्यको अहमदाबाद शहरमा बिहीवार दिउँसो एक भयावह विमान दुर्घटना भएको छ। लण्डन जाँदै गरेको एयर इण्डियाको यात्रुवाहक विमान उडान भरेको केही मिनेटमै एक मेडिकल कलेजमा खस्दा २०४ जनाको मृत्यु भएको अधिकारीहरूले पुष्टि गरेका छन्। दुर्घटनालाई भारतको दशकौँ यताकै सबैभन्दा डरलाग्दो हवाइ दुर्घटना मानिएको छ।
दुर्घटना दिउँसो १:३८ बजे (स्थानीय समयअनुसार) बोइङ ७८७–८ विमान उडान भरेको पाँच मिनेटमै मेघानी नगर भन्ने आवासीय क्षेत्रमा भएको हो। विमानमा २४२ जना यात्रु र चालक दलका सदस्य सवार थिए, जसमा ५३ जना बेलायती नागरिक पनि समावेश थिए।
विमानको केही भाग अहमदाबादस्थित एक मेडिकल कलेजको भवनमा खसेकोले कम्तीमा पाँच जना मेडिकल विद्यार्थीको ज्यान गएको छ भने झण्डै ५० जना घाइते भएका छन्। घटनास्थलमा उद्धारकार्य जारी रहँदा ठूलो संख्यामा सुरक्षाकर्मी, दमकलकर्मी र स्वास्थ्यकर्मी परिचालन गरिएको छ।
अहमदाबादका प्रहरी प्रमुखले बताएअनुसार हालसम्म २०४ शवहरू बरामद गरिएको छ र ४१ जनाको उपचार विभिन्न अस्पतालहरूमा भइरहेको छ।
नागरिक उड्डयन महानिर्देशनालयका महानिर्देशक फैज अहमद किदवईका अनुसार विमानमा कुनै प्रविधिक गडबडी भएको प्रारम्भिक अनुमान गरिएको छ तर विस्तृत अनुसन्धान भइरहेको छ। विमानको ब्ल्याक बक्स बरामद भइसकेको छ र घटनाको छानबिनका लागि उच्चस्तरीय समिति गठन गरिएको छ।
यस दर्दनाक दुर्घटनापछि विश्वभरका नेताहरूले भारत र पीडित परिवारप्रति गहिरो दुःख व्यक्त गरेका छन्।
अमेरिकी राष्ट्रपति डोनाल्ड ट्रम्पले दुर्घटनालाई “भयावह” भन्दै अमेरिकाले भारतलाई आवश्यक सहयोग प्रस्ताव गरिसकेको बताएका छन्।
संयुक्त राष्ट्रसंघका महासचिव एन्टोनियो गुटेरेस, रुसी राष्ट्रपति भ्लादिमिर पुटिन, क्यानडाका प्रधानमन्त्री मार्क कार्नी, र अमेरिकी विदेशमन्त्री मार्को रुबियोसहित धेरै विश्व नेताहरूले शोक सन्देश दिएका छन्।
संयुक्त विज्ञप्तिमा गुटेरेसले भने, “भारतको अहमदाबादमा भएको यो विनाशकारी विमान दुर्घटनाको खबरले मलाई अत्यन्त मर्माहत बनायो। आफ्ना प्रियजन गुमाएका सबैप्रति मेरी प्रार्थना छ।”
बेलायती प्रधानमन्त्री कीर स्टार्मरले दुर्घटनालाई “विनाशकारी क्षण” भनेका छन् भने बेलायती मन्त्री लुसी पावेलले बेलायत सरकारले पीडितहरूलाई जति सकिन्छ त्यति सहयोग गर्ने प्रतिबद्धता जनाएकी छन्।
बेलायती राजा चार्ल्स तृतीयले पनि शोक सन्देश पठाएका छन्। उनले भने, “यो दुर्घटनाको खबर सुन्दा म र मेरी पत्नी, रानी क्यामिलालाई गहिरो आघात पुगेको छ। यो अत्यन्तै दुखद घटना हो जसले थुप्रै राष्ट्रलाई पिडित बनाएको छ। पीडितहरूका परिवार र मित्रप्रति हाम्रो विशेष प्रार्थना र समवेदना व्यक्त गर्दछौं।”
घटनास्थलमा अहिले पनि उद्धार र राहत कार्य जारी रहेको छ। भारत सरकारद्वारा राहत कोष स्थापना गरिने घोषणा गरिएको छ। प्रधानमन्त्री कार्यालयले घटनाको गम्भीरता बुझ्दै तत्काल सहयोगस्वरूप प्रभावित परिवारलाई राहत रकम उपलब्ध गराउने बताएको छ।