ट्रम्पको कार्यकाल सुरु भएपछि सीबीपीले विमानस्थलमा रोक्यो ४७ जना नेपाली
प्रकाशित मिति : जेष्ठ २६, २०८२ सोमबार
ट्रम्प प्रशासनले ४ महिनामा ४७ जना नेपालीहरुलाई अमेरिकी विमानस्थलहरु लगायतका पोर्ट अफ इन्ट्रीमा रोकेको रिपोर्ट सार्वजनिक भएको छ । उनीहरुलाई अमेरिका प्रवेशका लागि अयोग्य भएको आशंकामा रोकिएको हो ।
सीबीपीको पछिल्लो रेकर्ड अनुशार फेब्रुअरीमा १४ जना, मार्चमा ६ जना, अप्रिलमा २१ जना र मे महिनामा ६ जना नेपालीहरुलाई अमेरिका प्रवेशका लागि अयोग्य भएको आशंकामा विमानस्थल लगायतका पोर्ट अफ इन्ट्रीमा रोकिएको थियो । तीमध्ये कैयन नेपालीहरु भिसा आवेदन फिर्ता लिएर विमानस्थलबाटै स्वेदश फर्किएका थिए ।
फेब्रुअरीमा रोकिएका १४ जनामध्ये ६ जनालाई सीबीपीले अमेरिकाभित्र परोल गरेको थियो भने ४ जना क्रु मेम्बरहरु थिए । ३ जनाले आफ्नो भिसा फिर्ता लिएर विमानस्थलबाटै फर्किएका थिए भने १ जनालाई तीब्र गतिको देशनिकालामा राखिएको थियो । उनीहरुमध्ये १ जना ग्रिनकार्डवाहक समेत थिए भने २ जना क्रु मेम्बरहरुलाई विमानबाटै हिराशतमा लिइएको थियो ।
त्यस्तै मार्चमा रोकिएका ६ जनामध्ये ४ जनाले भिसा फिर्ता लिएर विमानस्थलबाटै फर्किएका थिए भने २ जना क्रु मेम्बरहरु थिए । अप्रिलमा रोकिएका २१ जनामध्ये १८ जनाले भिसा फिर्ता लिएर विमानस्थलबाटै स्वेदश फर्किएका थिए भने १ जनालाई तीब्र गतिको देशनिकालामा राखिएको थियो । अन्य २ जना क्रु मेम्बरहरु थिए । कुल २१ मध्ये जना १९ जना अमेरिका प्रवेशका लागि आवेदन दिएका अन्य प्रकारका नेपाली आप्रवासीहरु रहेको सीबीपीले जनाएको छ । त्यस्तै मे महिनामा रोकिएका ६ जनामध्ये ३ जनाले भिसा फिर्ता लिएका थिए भने ३ जना क्रु मेम्बरहरु थिए ।
गत अक्टोबरदेखि सुरु भएको चालु आर्थिक बर्षमा मे महिनासम्म कुल २०० जना नेपालीहरुलाई विमानस्थल लगायतका पोर्ट अफ इन्ट्रीमा रोकिएको थियो । उनीहरुमध्ये ५ जना ग्रिनकार्डवाहक रहेका थिए भने ३७ जना विमान वा पानीजहाजका कर्मचारीहरु थिए । एकजना एसाइली समेत रहेका थिए । १५३ जना अन्य भिसा वाहकहरु रहेको जनाइएको छ ।
तीमध्ये १३९ जनाले आफ्ना भिसा फिर्ता लिएर विमानस्थल वा पोर्ट अफ इन्ट्रीबाट अमेरिका प्रवेश नगरी स्वदेश फर्केका थिए भने १२ जनालाई तीब्र गतिको देशनिकालाको प्रकृयामा राखिएको थियो । ११ जनालाई सीबीपीले परोल गरेर अमेरिका प्रवेश गर्न दिएको थियो भने ६ जनालाई देशनिकालाको प्रकृया आगाडि बढाउन अदालतमा नोटिस टु अपियर जारी गरिएको थियो ।