ट्रम्पको नेशनल गार्ड परिचालनको निर्णयविरुद्ध क्यालिफोर्नियाद्वारा मुद्दा दायर गर्ने घोषणा
प्रकाशित मिति : जेष्ठ २६, २०८२ सोमबार
क्यालिफोर्नियाका गभर्नर गेभिन न्यूसमले अमेरिकी राष्ट्रपति डोनाल्ड ट्रम्पले क्यालिफोर्निया राज्यको नेशनल गार्डलाई संघीय नियन्त्रणमा लिने आदेशविरुद्ध अदालतमा मुद्दा दायर गर्ने घोषणा गरेका छन्। गभर्नर न्यूसमले सामाजिक सञ्जालमार्फत सोमबार अदालतमा मुद्दा दायर गरिने जानकारी दिएका हुन्।
यसैबीच, लस एन्जलस शहरमा ट्रम्प प्रशासनको आप्रवासन नीतिविरुद्धको प्रदर्शन चौथो दिनमा पनि जारी रहेको छ। प्रदर्शनकारी र सुरक्षाकर्मीबीच लगातार झडप भइरहेका छन्।
सुरक्षा अधिकारीहरूका अनुसार शुक्रबारदेखि हालसम्म लस एन्जलसमा करिब १५० जना पक्राउ परेका छन्। अधिकारीहरूले प्रदर्शन रोक्न अश्रुग्यास, रबरको गोली तथा अन्य भीड नियन्त्रणका उपकरण प्रयोग गरेका छन्। प्रदर्शनकारीहरूले प्रहरीका गाडीमा ढुंगा र पटाका फ्याँकेका थिए भने स्कुटरसमेत प्रहार गरेका थिए।
राष्ट्रपति ट्रम्पले २ हजार नेशनल गार्डका सैनिकहरू परिचालन गर्दै प्रदर्शन नियन्त्रणका लागि संघीय शक्तिको असाधारण प्रयोग गरेका हुन्। यो कदम गभर्नर न्यूसमको अनुमतिबिना लिइएको थियो। गभर्नर न्यूसमले ट्रम्प प्रशासनको आलोचना गर्दै गरिब मानिसलाई जीवन बिताउन र ४ वर्षका बालिकाहरूलाई पढ्न दिनुपर्ने बताएका छन्।
हालसम्म अधिकांश प्रदर्शनहरू शान्तिपूर्ण नै रहेका छन् र नेशनल गार्डको संलग्नता सीमित देखिएको छ। लस एन्जलसका धेरैजसो स्थानहरूमा सामान्य जनजीवन चलिरहेको छ।
राष्ट्रपति ट्रम्पले मध्यरातमा सामाजिक सञ्जालमा लेख्दै “लस एन्जलसको अवस्था निकै खराब” भन्दै सैनिक परिचालनको समर्थन गरेका छन्। सन् १९६५ पछि पहिलो पटक कुनै राष्ट्रपतिले राज्यको अनुरोधबिना संघीय रूपमा नेशनल गार्ड परिचालन गरेको यो पहिलो घटना हो।
रबरका गोलीले धेरै पत्रकारहरू घाइते भएका छन्। अष्ट्रेलियाकी पत्रकार लोरेन टोमासीलाई प्रत्यक्ष प्रसारणका क्रममा प्रहरीको गोली लाग्दा चोट लागेको छ।
अष्ट्रेलियाको विदेश मन्त्रालयले उक्त घटनाको निन्दा गर्दै पत्रकारहरूले सुरक्षित रूपमा काम गर्न पाउनुपर्ने बताएको छ। त्यस्तै, बेलायती फोटो पत्रकार निक पनि घाइते भएका छन्।