ट्रम्पद्वारा हार्वर्डका नयाँ अन्तर्राष्ट्रिय विद्यार्थीको भिसा निलम्बन गर्ने घोषणामा हस्ताक्षर
राष्ट्रपति डोनाल्ड ट्रम्पले हार्वर्ड विश्वविद्यालयमा नयाँ अन्तर्राष्ट्रिय विद्यार्थीहरूका भिसा निलम्बन गर्ने घोषणामा हस्ताक्षर गरेको ह्वाइट हाउसले बुधबार जनाएको छ। यो कदम विदेशी विद्यार्थीहरूलाई अमेरिकाका एलिट विश्वविद्यालयमा भर्ना हुनबाट रोक्ने प्रयासको नाटकीय वृद्धि हो।
घोषणाले अमेरिकामा एफ, एम वा जे भिसा अन्तर्गत कुनै पनि नयाँ हार्वर्ड अन्तर्राष्ट्रिय विद्यार्थीको प्रवेश निलम्बन गर्ने जनाइएको छ। साथै, अमेरिकी विदेशमन्त्रीलाई घोषणाको मापदण्डमा पर्ने हालका हार्वर्ड विद्यार्थीहरूको विद्यमान भिसा खारेज गर्नेबारे विचार गर्न निर्देशन दिइएको ह्वाइट हाउसले बुधबारको एक वक्तव्यमा भनेको छ।
हार्वर्डमाथि चिन्ताजनक विदेशी सम्बन्ध भएको आरोप लगाउँदै ह्वाइट हाउसले यो कदम ‘राष्ट्रिय सुरक्षाको रक्षा’ गर्ने प्रयास भएको बताएको छ। घोषणाले विश्वविद्यालयले विदेशी विद्यार्थीहरूको बारेमा पर्याप्त जानकारी प्रदान गर्न असफल भएको र केवल तीन जना विद्यार्थीका अपूर्ण डेटा रिपोर्ट गरेको उल्लेख गरेको छ।
हार्वर्डले या त विदेशी विद्यार्थीहरूको अनुशासन रेकर्ड पूर्ण रूपमा रिपोर्ट नगरेको वा आफ्ना विदेशी विद्यार्थीहरूलाई गम्भीर रूपमा नियमन नगरेको ह्वाइट हाउसले बताएको छ। क्याम्पसमा यहूदी विरोधी भावना सम्बोधन गर्न असफल भएको र विविधता, समानता, र समावेशितालाई प्राथमिकता दिएको आरोप पनि ह्वाइट हाउसले लगाएको छ।
यो कदम गत हप्ता अमेरिकी जिल्ला अदालतकी न्यायाधीश एलिसन बरोउजले ट्रम्प प्रशासनलाई हार्वर्डको अन्तर्राष्ट्रिय विद्यार्थी भिसा कार्यक्रममा कुनै परिवर्तन नगर्न अनिश्चितकालसम्म आदेश दिएपछि आएको हो। यो आदेश न्यायाधीशले प्रशासनको विश्वविद्यालयको विदेशी विद्यार्थी भर्ना गर्ने क्षमता खारेज गर्ने निर्णयलाई अस्थायी रूपमा रोकेको केही दिनपछि आएको थियो।
अदालतको कार्यवाही डिपार्टमेन्ट अफ होमल्याण्ड सेक्युरिटी सेक्रेटरी क्रिस्टी नोएमले आफ्नो एजेन्सीलाई हार्वर्डको स्टुडेण्ट एण्ड एक्सचेन्ज भिजिटर प्रोग्राम खारेज गर्न दिएको निर्देशनबाट उत्पन्न भएको थियो। अप्रिलमा डिपार्टमेन्ट अफ होमल्याण्ड सेक्युरिटीले अनुरोध गरेको विदेशी विद्यार्थीहरूको आचरण रेकर्डहरू हार्वर्डले उपलब्ध नगराएको भन्दै विश्वविद्यालयको स्टुडेण्ट एण्ड एक्सचेन्ज भिजिटर प्रोग्राम प्रमाणीकरण समाप्त गर्न आदेश दिएको थियो।
स्टुडेण्ट एण्ड एक्सचेन्ज भिजिटर प्रोग्रामबाट विश्वविद्यालय हटाउनका लागि सरकारले आफ्नै आवश्यकताहरू पालना गर्न असफल भएको हार्वर्डले आरोप लगाएको छ। यो खारेजी सरकारको स्पष्ट प्रतिशोध भएको तर्क हार्वर्डले गरेको छ।
हार्वर्ड र ट्रम्प प्रशासनका अधिकारीहरू महिनौंदेखि द्वन्द्वमा रहेका छन्। ट्रम्प प्रशासनले विश्वविद्यालयलाई क्याम्पस कार्यक्रम, नीति, भर्ना र प्रवेशमा परिवर्तन गर्न माग गरेको छ। क्याम्पसमा यहूदी-विरोधी भावना हटाउन र ‘जातिवादी विविधता, समानता, र समावेशिता’ अभ्यासहरू भनिएको कुरा हटाउन ट्रम्प प्रशासनले प्रयास गरिरहेको छ। ह्वाइट हाउसले इजरायल-हमास युद्धमा विवादास्पद क्याम्पस विरोधमा भाग लिएका विदेशी विद्यार्थी र कर्मचारीहरूलाई निशाना बनाएको छ।
ट्रम्पको नयाँ घोषणाले राष्ट्रिय हितमा मानिएको विदेशीहरूको प्रवेशलाई छुट दिन्छ। साथै, स्टुडेण्ट एण्ड एक्सचेन्ज भिजिटर प्रोग्राम मार्फत अन्य अमेरिकी विश्वविद्यालयहरूमा पढ्ने विदेशीहरूलाई भने यो कार्यक्रम लागू हुँदैन।
