क्यालिफोर्नियाको विष्फोटन आतंकवादी हमला भएको एफबीआईको भनाई
प्रकाशित मिति : जेष्ठ ४, २०८२ आईतबार
अमेरिकाको क्यालिफोर्नियाको एक प्रजनन क्लिनिकबाहिर भएको बम विस्फोटनको घटना आतंकवादी हमला भएको अधिकारीहरुले बताएका छन । उक्त घटनामा एकजनाको मृत्यु भएको थियो । अन्य ४ जना घाइते भएका थिए ।
एफबीआईका अधिकारीहरूले यो घटना उद्धेश्यप्रेरित आतंकवादी हमला भएको बताएका हुन । विस्फोट शनिबार स्थानीय समयअनुसार बिहान ११ बजेभन्दा केही अघि, पाम स्प्रिङ्स सहरको केन्द्रबाट झन्डै एक माइल टाढा रहेको अमेरिकन रिप्रोडक्टिभ सेन्टर्स नजिकैका केही व्यवसायीक क्षेत्रहरूमा भएको हो।
क्लिनिकले उनीहरूका कुनै पनि कर्मचारी वा बिरामीलाई क्षति नपुगेको बताएको छ । एफबीआईले एक जनालाई अनुसन्धानका लागि आशंका गरेको छ ।
एफबीआई र अधिकारीहरूको भनाइ
एफबीआईले शनिबार दिएको ब्रिफिङमा यो हमला उद्देश्यप्रेरित भएको पुष्टि गरेको हो ।
“यो एक जानाजान गराइएको आतंकवादी हमला हो। हाम्रो अनुसन्धानबाट यो घरेलु आतंकवाद हो कि अन्तर्राष्ट्रिय भन्ने थाहा हुनेछ,” एफबीआइको लस एन्जलस फील्ड कार्यालयका प्रमुख अकिल डेभिसले भनेका छन ।
पाम स्प्रिङ्स प्रहरी प्रमुख एन्डी मिल्सले विस्फोटबाट भवनहरूमा केही गम्भीर रूपमा, क्षतिग्रस्त भएको जनाए। उनले विस्फोटमा मृत्यु हुने व्यक्तिको पहिचान हुन बाँकी रहेको पनि बताए।
क्लिनिकले भने विस्फोट क्लिनिक भवन नजिकैको पार्किङ क्षेत्रमा भएको पुष्टि गर्यो। पाम स्प्रिङ्सका मेयर रोन डे हार्टेले विस्फोट “गाडीभित्र वा वरिपरिको क्षेत्रमै” भएको बताएका छन्।
क्लिनिक सुरक्षित, तर कार्यालयमा क्षति
क्लिनिकले आफ्नो प्रयोगशाला, अण्डा र भ्रूणहरू पूर्ण रूपमा सुरक्षित रहेको बताएको छ।
यो क्लिनिक कोआचेला भ्यालीको पहिलो पूर्ण सेवायुक्त प्रजनन केन्द्र तथा आईभीएफ प्रयोगशाला हो। यहाँ प्रजनन परीक्षण, आईभीएफ अण्डा दान र फ्रिजिङ, समलैंगिक दम्पतीहरूको प्रजनन सहयोग र सरोगेसी सेवा दिइन्छ।
सरकारी प्रतिक्रिया
क्यालिफोर्नियाका गभर्नर ग्याभिन न्यूसमले राज्यले संघीय तथा स्थानीय अधिकारीहरूसँग सहकार्य गरिरहेको बताएका छन्। अमेरिकी अटर्नी जनरल पाम बन्डीले पनि घटनाबारे ब्रिफिङ लिएको पुष्टि गरेकी छन्।