लस भेगस गोलीकाण्डमा ५० जनाको मृत्यु
प्रकाशित मिति : आश्विन १६, २०७४ सोमबार
अमेरिकाको लास भेगसमा भएको गोलीकाण्डमा कम्तीमा ५० जनाको मृत्यु भएको छ । सांगीतिक कार्यक्रम चलिरहेका बेला नजिकैको होटलको ३२औं तलाबाट बन्दुकधारीले गोली चलाउँदा दुई सय जनाभन्दा बढी घाइते भएका छन् । स्थानीय ६४ वर्षीय स्टेफेन प्याडोकले आक्रमण गरेको प्रहरीले जनाएको छ।
बन्दुकधारीलाई प्रहरीले गोली हानी मारिदिएका छन्। अमेरिकी इतिहासमा यो सबैभन्दा भयानकमध्येको एक गोलीकाण्ड हो। बन्दुकधारी कुनै लडाकु समूहसँग आवद्ध रहेको प्रमाण फेला परेको छैन । बन्दुकधारीसँग रहेकी एक महिलालाई प्रहरीले फेला पारेको छ ।
सन् २०१७ मा मात्र अमेरिकामा १६० भन्दा धेरै बन्दुक हमलाका घटना भएका छन् । सन् २०१७ को सुरुवातदेखि अहिलेसम्म अमेरिकामा बन्दुक हमलाका घटनामा झण्डै ७ हजारको ज्यान गएको छ भने १३ हजार घाइते भएका छन्, जसमा बन्दुकबाट आत्महत्याको तथ्यांक समावेश गरिएको छैन ।
आम हमलाबारे कुनै आधिकारिक परिभाषा नभएपनि अमेरिकामा कुनै एक स्थानमा चारजना वा त्योभन्दा धेरै घाइते हुने गरी वा ज्यान गुमाउनेगरी भएको हमलालाई आम हमला भन्ने गरिएको छ । सन् २०१७ मा विगतको बर्षका तुलनामा अमेरिकामा यस्ता हमला अझ बढेका छन् । ९ महिनाको अवधिमा १६० वटा भन्दा धेरै हमलाले अमेरिकामा बन्दुक ठूलो समस्या बन्दै गएको पुष्टी भएको छ ।