रुसी जासूस गिरोहका प्रमुखलाई बेलायतमा ११ वर्षको जेल सजाय
प्रकाशित मिति : बैशाख २९, २०८२ सोमबार
बेलायतमा आधारित रूसी जासूस समूहका प्रमुख ओर्लिन रूसेभलाई लन्डनको अदालतले सोमबार करिब ११ वर्षको जेल सजाय सुनाएको छ। अभियोजकहरूका अनुसार, रूसेभले क्रेमलिनको लागि निगरानी गरेको आरोपमा दोषी ठहरिएका थिए। उनको पाँच सदस्यीय टोलीलाई कुल ४० वर्षको जेल सजाय तोकिएको छ।
४७ वर्षीय रूसेभले रूसको लागि जासूसी गरेको एक कसूरमा दोषी स्वीकार गरेका थिए। प्रहरीले उनको र वायरकार्ड भगौडा जान मार्सालेक्ससँग हजारौं सन्देश फेला पारेका थिए, जसले विदेशबाट बल्गेरियाली नागरिकहरूको इकाइलाई निर्देशन दिएका थिए। न्यायाधीश निकोलस हिलियार्डले रूसेभको कार्यले बेलायतको राष्ट्रिय सुरक्षालाई गम्भीर खतरा उत्पन्न गरेको बताए।
रूसेभसहित छ बल्गेरियालीलाई मार्सालेक्सद्वारा निर्देशित टोलीमा पत्रकार, असन्तुष्ट र जर्मनीको अमेरिकी सैन्य आधारमा तालिमरत युक्रेनी सैनिकहरूको निगरानी गरेको अभियोगमा दोषी ठहर गरिएको छ। टोलीका सदस्यहरू बिजेर जाम्बाजोभ, क्याट्रिन इभानोभा, वान्या गाबेरोभा, तिहोमिर इभान्चेभ र इभान स्टोयानोभलाई विभिन्न अवधिको जेल सजाय सुनाइएको छ।
अभियोजकहरूले यो इकाइ रूसी गुप्तचरसँग प्रत्यक्ष रूपमा नजोडिएको र मुख्य रूपमा पैसाले प्रेरित भएको बताए। लन्डनस्थित रूसी दूतावासले यो मुद्दामा टिप्पणी गरेको छैन। युक्रेन युद्धपछि बेलायत र रूसबीचको सम्बन्ध शीतयुद्धपछिको न्यूनतम स्तरमा झरेको छ।
प्रहरीका अनुसार, यो समूहले ूऔद्योगिक स्तरमाू जासूसी गरेको थियो, जसमा जर्मनीको अमेरिकी आधारमा युक्रेनी सैनिकहरूको तालिम निगरानी गर्ने योजना पनि समावेश थियो। मार्सालेक्स र रूसेभबीचका सन्देशहरूमा रूसी सैन्य गुप्तचरको उल्लेख, ड्रोन आपूर्ति र २०१८ मा रूसी एजेन्ट सर्गेई स्क्रिपालको विषाक्तताबारे छलफल समावेश थियो।
मार्सालेक्सको ठेगाना अज्ञात छ, तर उनको ठेगाना रूसमा रहेको विश्वास गरिन्छ।