एनपीआर र पीबीएस समाचार संस्थाहरूको कोष कटौती गर्ने कार्यकारी आदेशमा ट्रम्पको हस्ताक्षर
प्रकाशित मिति : बैशाख १९, २०८२ शुक्रबार
Trump Alabama
अमेरिकी राष्ट्रपति डोनाल्ड ट्रम्पले एनपीआर र पीबीएस जस्ता समाचार संस्थाहरूको कोष कटौती गर्ने लक्ष्य राखिएको एक कार्यकारी आदेशमा हस्ताक्षर गरेका छन्। ह्वाइट हाउसले यो कदमलाई ट्रम्पको ती संस्थाहरूलाई पक्षपाती र पूर्वाग्रही ठान्ने दृष्टिकोणसँग जोडेको छ, जसलाई उनले मन पराउँदैनन्।
यो आदेशले पब्लिक ब्रोडकास्टिङ कर्पोरेसन (सीपीबी), जसले पीबीएस र एनपीआर स्टेशनहरूलाई कोष वितरण गर्छ । यी संस्थाहरूलाई प्रत्यक्ष कोष रोक्न निर्देशन दिएको छ। ‘सीपीबी बोर्डले कानूनले अनुमति दिएको अधिकतम हदसम्म विद्यमान कोष रद्द गर्नेछ र भविष्यमा कोष प्रदान गर्न अस्वीकार गर्नेछ’, आदेशमा उल्लेख छ।
साथै, अप्रत्यक्ष कोष पनि निलम्बन गर्ने गरी सीपीबीले पब्लिक रेडियो र टेलिभिजन स्टेशनहरूले संघीय कोष एनपीआर र पीबीएसका लागि प्रयोग नगर्ने सुनिश्चित गर्नुपर्नेछ।
एनपीआर र पीबीएसले यो कदमले स्थानीय र राष्ट्रिय विश्वसनीय समाचार सेवामा गम्भीर अवरोध पुग्ने र आपतकालीन अवस्थामा समाचारमा निर्भर अमेरिकी जनतामाथि ‘विनाशकारी प्रभाव’ पर्ने चेतावनी दिएका छन्। एनपीआरमा ९०० भन्दा बढी कर्मचारी छन् भने पीबीएसमा ५५० भन्दा बढी कर्मचारी रहेको अनुमान छ।
ट्रम्प प्रशासनले हार्वर्ड, कोलम्बिया विश्वविद्यालयदेखि भ्वाइस अफ अमेरिका, रेडियो फ्री एशिया जस्ता संस्थाहरूलाई पनि वामपन्थी र पक्षपातीको आरोप लगाउँदै कोष कटौती वा बन्द गर्ने प्रयास गरेको छ। यी कदमले स्वतन्त्र अभिव्यक्ति र शैक्षिक स्वतन्त्रतामाथि प्रश्न उठाएको मानवअधिकार समर्थकहरूले बताएका छन्।
सीपीबीले सोमबार ह्वाइट हाउसविरुद्ध मुद्दा दायर गरेको छ, जब ट्रम्पले यसका पाँच बोर्ड सदस्यहरूमध्ये तीन जनालाई बर्खास्त गर्न खोजेका थिए। मिडिया रिपोर्टहरूका अनुसार, ह्वाइट हाउसले कांग्रेसलाई सीपीबीको १.१ बिलियन डलर कोष, अर्थात् दुई वर्षको कोष, रद्द गर्न आग्रह गर्ने योजना बनाएको छ।
ट्रम्प र उनका सहयोगी एलोन मस्कले जनवरीमा पदभार ग्रहण गरेयता लागत कटौतीको अभियान चलाएका छन्, जसले विभिन्न सरकारी एजेन्सीहरूको विघटन र २ लाखभन्दा बढी संघीय कर्मचारी कटौती गर्ने योजना छ ।