अमेरिकामा जन्मिएकी एक अमेरिकी नागरिक डाक्टरलाई पनि तत्काल देश छाड्न सरकारी इमेल
प्रकाशित मिति : बैशाख ४, २०८२ बिहीबार
अमेरिकामा जन्मिएकी एक डाक्टरले अमेरिकाका संघीय आप्रवासन अधिकारीहरूबाट तत्काल देश छोड्न माग गर्दै पठाइएको इमेल प्राप्त गरेको बताएकी छन्। कनेक्टिकटको क्रमवेलकी डाक्टर लिसा एन्डरसनले पनि डिपार्टमेन्ट अफ होमल्याण्ड सेक्युरिटीबाट यस्तो इमेल प्राप्त गरेको बताएकी छिन्।
इमेलमा उनलाई अमेरिका छोड्ने समय आएको सूचित गरिएको थियो। आप्रवासन अधिकारीहरूले गैरनागरिकहरूलाई स्वेच्छाले देश छोड्न दबाब दिइरहेका छन्, किनकि देशनिकालाको संख्या गत वर्षको तुलनामा लगभग समान स्तरमा रहेको छ।
५८ वर्षीया एन्डरसनको जन्म पेन्सिल्भेनियामा भएको हो र उनी अमेरिकी नागरिक हुन्। तर आप्रवासन अधिकारीहरूले पठाएको इमेलको भाषा जसलाई लक्षित भए पनि उनीहरूका लागि निकै धम्कीपूर्ण रहेको उनले बताएकी छिन्। यद्यपि यो इमेल उनलाई सरकारले गल्तीले पठाएको विश्वास गरिएको छ।
डिपार्टमेन्ट अफ होमल्याण्ड सेक्युरिटीका अनुसार अमेरिकामा कागजात नभएका आप्रवासीहरूलाई यस्ता सूचनाहरू जारी गरिएको छ। कुनै आप्रवासीले अमेरिकी नागरिकको सम्पर्क दिएको खण्डमा त्यस्ता इमेलहरू अमेरिकी नागरिकलाई प्राप्त भएको हुनसक्ने डिपार्टमेन्ट अफ होमल्याण्ड सेक्युरिटीका अधिकारीहरूको भनाइ छ। सीबीपीले सञ्चारको निगरानी गरिरहेको र कुनै पनि समस्यालाई व्यक्तिगत आधारमा समाधान गर्ने बताएको छ।
यसअघि यस्तै इमेल बोस्टनकी एक अध्यागमन वकिललाई पनि आएको थियो। उनी पनि अमेरिकी नागरिक थिइन्। वकिललाई सात दिनभित्र देश छोड्न भनिएको यस्तै इमेल प्राप्त भएको केही दिनपछि यो घटना भएको हो। वकिललाई पनि गल्तीले इमेल गएको विश्वास गरिएको छ।
वकिल निकोल मिचेरोनीले संघीय अधिकारीहरूबाट कुनै फलोअप नआएको बताएकी छिन्। एन्डरसनले इमेल प्राप्त गरेपछि सधैं आफ्नो अमेरिकी राहदानी बोकेर हिँडिरहेकी छिन्।