Follow @khasokhasmag

‘भूकम्पपीडितलाई आठ लाख सम्भव’


प्रकाशित मिति : भाद्र २६, २०७३ आईतबार

प्रधानमन्त्री पुष्पकमल दाहालले आफूले व्यवस्थापिका–संसद्मा गरेको सम्बोधनमा ल्याइएको नीति तथा कार्यक्रम लागू गर्न सम्भव हुने जिकिर गरेका छन् ।

नेपाल टेलिभिजनबाट प्रसारित ‘सिधा कुरा प्रधानमन्त्रीसँग’ कार्यक्रममा प्रधानमन्त्री प्रचण्डले भने, ‘अरबौँ रुपियाँ ढुकुटीमा थन्किनुभन्दा भूकम्पपीडितका लागि आठ लाख दिनु सम्भव छ ।’

पछिल्लोपटक मुलुकका विभिन्न स्थानमा भइरहेको बाढी पहिरोलगायत अन्य विपत्लाई सरकारले सम्बोधन गर्नेबारे तयारी भइरहेको समेत प्रधानमन्त्री दाहालले जानकारी दिए । उनले विभिन्न माग राखेर पटकपटक आमरण अनशनमा बस्दै आएका डा. गोविन्द केसीका जायज माग पूरा गर्ने प्रतिबद्धता व्यक्त गर्दै उनलाई धैर्य गर्न पनि अपिल गरे ।

उनले रोजगारका लागि विदेश गएका युवालाई देशभित्रै ल्याउने र नेपालका कलकारखानाको विकास गर्दै जतिसक्दो चाँडो नेपालमै रोजगार सिर्जना गर्ने प्रतिबद्धता व्यक्त गरेका गोरखापत्रमा खबर छ । संसद्मा सम्बोधनका क्रममा जन्म र मरणमा कर्णालीवासीलाई २० केजी चामल दिन भएको घोषणा अपमान नभई सद्भाव र प्रेममात्रै भएको उनको भनाइ थियो ।

आफू भारत भ्रमण जानुभन्दा अघि नै संविधान संशोधन प्रस्ताव दर्ता गराउन दलहरूसँग तीव्र छलफल भइरहेको प्रधानमन्त्री दाहालले बताए । एक प्रश्नको जवाफमा प्रधानमन्त्री दाहालले यातायातको क्षेत्रलाई थप व्यवस्थित गर्दै उपत्यकाभित्रको सवारी समस्या समाधान गर्ने प्रतिबद्धतासमेत व्यक्त गरे ।

© 2021 KHASOKAHS. All Rights Reserved.
Khasokhas is not responsible for the content of external sites and user generated contains. We don't collect comments on this site.
DEVELOPED BY appharu.com