टेक्सासमा १९ बर्षका नेपाली विद्यार्थीको मोटरसाइकल दुर्घटनामा निधन
प्रकाशित मिति : चैत्र १३, २०८१ बुधबार
टेक्सासमा भएको मोटरसाइकल दुर्घटनामा नेपाली विद्यार्थी १९ बर्षीय इप्सन भट्टको निधन भएको छ । शनिबार बेलुका टेक्सास सान मार्कोसको सेवेल पार्क नजिकै भएको दुर्घटनामा गोरखा स्थायी घर भएका भट्टको निधन भएको त्यहाँबाट कैलाश हिराचनले खसोखासलाई जानकारी दिएका छन् ।
मोटरसाइकलमा अर्का एकजना भारतीय मूलका व्यक्ति समेत थिए, तर मोटरसाइकल कस्ले चलाएको थियो भन्नेबारे केही खुलेको छैन । सुरुमा ब्रेन डेड भएको भन्दै आइसीयुमा राखिएपनि अस्पतालले उनलाई मृत घोषणा गरिसकेको छ । उनको टाउकोमा गम्भिर चोट लागेको थियो ।
क्याम्पसबाट काम सकेर घर फर्कने क्रममा उनी सवार मोटरसाइकल सडकमा अर्को गाडीमा ठोक्किएको थियो । त्यसपछि उनलाई एसेन्सन सेटन हेज अस्पताल लगिएको थियो ।
युनिभर्सिटी अफ टेक्सासमा अध्ययनरत उनी झण्डै १५ महिना अगाडिमात्र अमेरिका आएको जनाइएको छ । युनिभर्सिटी अफ टेक्सासले नै भट्टको शव नेपाल पठाउन बन्दोबस्त गर्ने जानकारी दिएको हिराचनले बताए ।
एनआरएन टेक्सास च्याप्टरले सुरु गरेको गोफण्डमीमा यो समाचार तयार पार्दासम्म ४२ हजार डलर संकलन भइसकेको छ । उनी एफवान भिसामा अमेरिका आएका थिए । शव नेपाल पठाउन युनिभर्सिटीले नै सहयोग गर्ने भएका कारण संकलित रकम पारिवारिक सहयोगका लागि प्रदान गरिने भएको छ ।
उनका साथीभाइ र परिवारले उनी मेहनती, मायालु र महत्वाकांक्षी रहेको बताएका छन् । समुदाय र साथीहरुले उनीप्रति सामाजिक सञ्जालमार्फत श्रद्धाञ्जली व्यक्ति गरिरहेका छन् ।