ट्रम्प प्रशासनविरुद्ध मुद्दा हाल्ने विद्यार्थीलाई अध्यागमनसमक्ष आत्मसमर्पण गर्न आइसको इमेल
यहूदी विरोधी आरोप लगाइएका विदेशी विद्यार्थीहरूलाई लक्षित गरी राष्ट्रपति डोनाल्ड ट्रम्पले जारी गरेको आदेश रोक्न माग गदै अदालतमा मुद्दा दायर गरेका कोर्नेल विश्वविद्यालयका एक पीएचडी विद्यार्थीलाई आइसले आत्मसर्पणका लागि बोलाएको छ । मुद्दा दायर गरेको केही दिनपछि डिपार्टमेन्ट अफ जस्टिसका वकिलहरूले ती विद्यार्थीलाई अध्याष्गमन अधिकारीहरूसमक्ष आत्मसमर्पण गर्न भन्दै इमेल पठाएका थिए ।
बेलायत र गाम्बियाका दोहोरो नागरिक मोमोडोउ ताल कोर्नेलका तीन विद्यार्थीहरूमध्ये एक हुन् जसले ट्रम्पका कार्यकारी आदेशहरूको कार्यान्वयन रोक्न मुद्दा दायर गरेका छन्। यी आदेशहरू प्यालेस्टाइन समर्थक विरोध प्रदर्शनमा संलग्न विदेशी विश्वविद्यालयका विद्यार्थी र कर्मचारीहरूलाई देशनिकाला गर्न लक्ष्यीत रहेका छन् ।
केवल तानाशाहीमा मात्रै नेताले आफ्नो प्रशासनको आलोचना गर्ने राजनीतिक विरोधीहरूलाई जेल हाल्न र निर्वासित गर्नसक्ने ३१ वर्षीय तालले मुद्दासँगै दायर गरेको वक्तव्यमा लेखेका थिए । यो मुद्दा अमेरिकी अरब भेदभाव विरोधी समिति एडीसीका वकिलहरूले मार्च १५ मा दायर गरेका थिए।
मोमोडोउ ताल विश्वविद्यालय क्याम्पसमा यहूदी विरोधी प्रदर्शनमा आफ्नो भूमिकाका कारण गत वर्ष निलम्बनमा परेका थिए। मुद्दा दायर गरेको केही दिनपछि अज्ञात एजेन्सीका कानुन प्रवर्तन अधिकारीहरू उनलाई पक्राउ गर्न उनको घरमा आएको उनले सामाजिक सञ्जालमा उल्लेख गरेका छन् । त्यसपछि उनका वकिलहरूले उनलाई हिरासतमा लिन वा देशनिकालाको प्रयास रोक्न मोशन दायर गरेका थिए। अदालतले सरकारलाई शनिबार साँझ ५ बजेसम्म सो अनुरोधको जवाफ दिन आदेश दिएको थियो।
शुक्रबार बिहान तालका वकिलहरूलाई पठाइएको इमेलम डिपार्टमेन्ट अफ जस्टिसका वकिलले आइसको कार्यालयमा गएर आत्मसमर्पण गर्न भन्दै इमेल लेखेका थिए । ताल र उनका वकिललाई सिराक्यूजस्थित होमल्याण्ड सेक्युरिटी अनुसन्धान कार्यालयमा व्यक्तिगत रूपमा उपस्थित हुन आइसले बोलाएको उक्त इमेलमा उल्लेख थियो । सहमतिमा समय निर्धारण गरेर उक्त समयमा आइसको कार्यालयमा गएर नोटिस टु अपियर लिनका लागि जान उक्त इमेलमा भनिएको थियो ।
नोटिस टु अपियर औपचारिक देशनिकाला प्रक्रियाको पहिलो चरण हो । जस अन्तरगत देशनिकालाको प्रकृयामा रहेका व्यक्तिलाई अदालतको मिति उपलब्ध गराइन्छ । तालले ट्रम्प प्रशासनविरुद्ध कोलम्बिया विश्वविद्यालयका स्नातक र प्यालेस्टाइन समर्थक विरोध नेता महमूद खलिलको चर्चित गिरफ्तारीको केही हप्तापछि मुद्दा दायर गरेका थिए ।
मुद्दाका अन्य दुई उजुरीकर्ता दुवै अमेरिकी नागरिक हुन् । उनीहरु अंग्रेजी विभागका प्राध्यापक मुकोमा वा ङ्गुगी र एकीकृत बिरुवा विज्ञान स्कूलका पीएचडी विद्यार्थी श्रीराम परशुराम हुन् । उनीहरूको उजुरीमा प्रशासनको प्रदर्शनकारीहरूमाथिको कारबाहीले उजुरीकर्ताहरूलाई असंवैधानिक रूपमा मौन बनाएको र संरक्षित अभिव्यक्तिलाई चिसो पारेको उल्लेख छ ।
ताललाई गत वर्ष कोर्नेलले कथित रूपमा अवरोधकारी प्रदर्शनको लागि दुई पटक निलम्बन गरेको थियो र उनको निलम्बनले उनको भिसा गुमाउन सक्ने बताइएको थियो, तर अन्ततः उनलाई रिमोट तरिकाले कक्षा पुनः सुरु गर्न अनुमति दिइएको थियो । उनले ७ अक्टोबर २०२३ मा इजरायलमाथि भएको आक्रमणपछि अनलाइन टिप्पणीहरूको लागि आलोचना खेपेका छन्।
आक्रमण लगत्तै उनले जहाँ उत्पीडन हुन्छ, त्यहाँ त्यसको विरुद्ध लड्नेहरू भेटिन्छन् भन्दै प्रतिरोधलाई प्रोत्साहन दिने सामाजिक सञ्जाल पोष्ट गरेका थिए । गत हप्ता न्यायाधीशहरूले सरकारलाई खलिल र प्यालेस्टाइनी मूलकी पत्नी भएका जर्जटाउन विश्वविद्यालयका एक भारतीय नागरिकलाई देशनिकाला गर्नबाट रोकेका छन्।
