अमेरिकी नागरिकका छोराछोरीले ग्रिनकार्ड र आप्रवासी भिसा पाउने मितिमा अग्रता
प्रकाशित मिति : फाल्गुन २६, २०८१ सोमबार
अमेरिकी सरकारको विदेश मन्त्रालयअन्तर्गत ब्यूरो अफ कन्सुलर अफेयर्सले सोमबार सार्वजनिक गरेको भिसा बुलेटिनअनुसार अमेरिकी नागरिकका अमेरिकाबाहिर रहेका २१ वर्ष उमेर कटेका अविवाहित छोराछोरी र विवाहित छोराछोरीले ग्रिनकार्ड वा आप्रवासी भिसा पाउने मितिमा उल्लेखनीय अग्रता कायम भएको छ।
मार्चमा २२ नोभेम्बर २०१५ भन्दा अगाडिको प्राथमिकता मिति भएका अमेरिकी नागरिकका अमेरिकाबाहिर रहेका २१ वर्ष उमेर कटेका अविवाहित छोराछोरीले ग्रिनकार्ड वा आप्रवासी भिसा पाउन सक्ने अवस्था रहेकोमा अप्रिलका लागि यो मिति करिब ४ महिना सरेर १५ मार्च २०१६ मा पुगेको छ। अर्थात्, अप्रिलमा १५ मार्च २०१६ भन्दा अगाडिको प्राथमिकता मिति भएका यस्ता छोराछोरीले ग्रिनकार्ड वा आप्रवासी भिसा प्राप्त गर्न सक्नेछन्।
त्यस्तै, अमेरिकी नागरिकका अमेरिकाबाहिर रहेका विवाहित छोराछोरीको सन्दर्भमा मार्चमा ग्रिनकार्ड वा आप्रवासी भिसा पाउने मिति १ जुलाई २०१० रहेकोमा अप्रिलमा झण्डै ९ महिना सरेर १ अप्रिल २०११ कायम भएको छ। अमेरिकी नागरिकका छोराछोरीको सन्दर्भमा ग्रिनकार्ड वा आप्रवासी भिसा पाउने मितिमा भएको यो परिवर्तनले केही खुसी ल्याए पनि ग्रिनकार्डवाहकका परिवारको हकमा भने खासै परिवर्तन भएको छैन।
ग्रिनकार्डवाहकका श्रीमान्/श्रीमती र २१ वर्ष उमेर नकटेका विदेशमा रहेका छोराछोरीले ग्रिनकार्ड वा आप्रवासी भिसा पाउने मितिमा कुनै परिवर्तन भएको छैन। यो मिति मार्चमा १ जनवरी २०२२ रहेकोमा अप्रिलमा पनि सोही मिति कायम रहेको छ। तर, फाइलिङ मितिमा भने अप्रिलका लागि यो मिति १५ जुलाई २०२४ बाट १५ अक्टोबर २०२४ मा सरेको छ, जुन ३ महिनाको अग्रता हो। यो परिवर्तनले अमेरिकाभित्र रहेका आवेदकहरूलाई आवेदन दिन सहज बनाउनेछ।
ग्रिनकार्डवाहकका २१ वर्ष उमेर कटेका अविवाहित छोराछोरीको सन्दर्भमा पनि ग्रिनकार्ड वा आप्रवासी भिसा पाउने मितिमा उल्लेखनीय परिवर्तन भएको छैन। यो मिति मार्चको तुलनामा अप्रिलमा २ महिना सरेको छ। मार्चमा यो मिति २२ मे २०१६ रहेकोमा अप्रिलमा २२ जुलाई २०१६ कायम भएको छ। त्यस्तै, अमेरिकी नागरिकका दाजुभाइ/दिदीबहिनीले ग्रिनकार्ड वा आप्रवासी भिसा पाउने मितिमा पनि कुनै परिवर्तन भएको छैन। यो मिति मार्चमा १ अगस्ट २००७ रहेकोमा अप्रिलमा पनि सोही मिति कायम रहेको छ।
अमेरिकाभित्र रहेकाहरूको सन्दर्भमा भने ग्रिनकार्डवाहकका श्रीमान्/श्रीमती र २१ वर्ष उमेर नकटेका छोराछोरीको अनुहारमा अप्रिलको भिसा बुलेटिनले केही मुस्कान ल्याएको छ। मार्चमा १५ जुलाई २०२४ भन्दा अगाडिको प्राथमिकता मिति भएका अमेरिकाभित्र रहेका ग्रिनकार्डवाहकका श्रीमान्/श्रीमती र २१ वर्ष उमेर नकटेका छोराछोरीले ग्रिनकार्डका लागि आवेदन दिन सक्ने अवस्था रहेकोमा अप्रिलमा यो मिति ३ महिना सरेर १५ अक्टोबर २०२४ कायम भएको छ। अमेरिकी नागरिकका अमेरिकाभित्र रहेका दाजुभाइ/दिदीबहिनीको सन्दर्भमा पनि ग्रिनकार्ड फाइल गर्ने मिति अप्रिलमा १ महिना सरेको छ। मार्चमा यो मिति १ मार्च २००८ रहेकोमा अप्रिलमा १ अप्रिल २००८ कायम भएको छ।
तर, परिवारमा आधारित अन्य श्रेणीहरू—अमेरिकी नागरिकका २१ वर्ष उमेर कटेका अविवाहित छोराछोरी, विवाहित छोराछोरी र ग्रिनकार्डवाहकका २१ वर्ष उमेर कटेका अविवाहित छोराछोरीको सन्दर्भमा भने अमेरिकाभित्र ग्रिनकार्ड फाइल गर्ने मितिमा कुनै परिवर्तन भएको छैन। यो मिति मार्चमा क्रमशः १ सेप्टेम्बर २०१७, २२ जुलाई २०१२ र १ जनवरी २०१७ रहेकोमा अप्रिलका लागि पनि सोही मिति कायम रहेको छ।
तर, अमेरिकी नागरिकका विवाहित छोराछोरीका लागि फाइलिङ मितिमा सबै क्षेत्रका लागि ४ महिनाको अग्रता देखिएको छ, जुन ८ मे २००४ बाट २२ सेप्टेम्बर २००४ मा सरेको छ। त्यस्तै, अमेरिकी नागरिकका दाजुभाइ/दिदीबहिनीका लागि फाइलिङ मितिमा सबै क्षेत्रका लागि १ महिनाको अग्रता भएको छ, जुन १ मार्च २००८ बाट १ अप्रिल २००८ मा सरेको छ। यी परिवर्तनहरूले अमेरिकाभित्रका केही आवेदकहरूलाई फाइदा पुग्नेछ। जसले गर्दा ग्रिनकार्ड फाइल गर्नका लागि प्रतीक्षा अवधि अझै बढेको छ। यो मिति चीन, इन्डिया, मेक्सिको र फिलिपिन्सका सन्दर्भमा भने फरक रहेको छ ।