अवैध आप्रवासनलाई प्रोत्साहन गर्ने विदेशका सरकारी कर्मचारीलाई अमेरिकी भिसा प्रतिबन्ध घोषणा
प्रकाशित मिति : फाल्गुन २१, २०८१ बुधबार
अमेरिकी विदेश मन्त्रालयले अवैध आप्रवासनलाई सघाउने विदेशका सरकारी अधिकारी र कर्मचारी लगायतलाई भिसा प्रतिबन्ध लगाउने घोषणा गरेको छ । अमेरिकालाई सुरक्षित, बलियो र थप समृद्ध बनाउन अमेरिकाको सिमाना सुरक्षित गर्नु अत्यन्तै महत्त्वपूर्ण रहेको उल्लेख गर्दै अमेरिकी विदेशमन्त्री मार्को रुबियालेले बुधबार नयाँ भिसा प्रतिबन्ध नीति घोषणा गरेका हुन् ।
यो प्रतिबन्ध अवैध आप्रवासनलाई सघाउने विदेशी सरकारका अधिकारीहरु, अध्यागमन र भन्सार अधिकारीहरू, विमानस्थल र बन्दरगाह प्राधिकरणका अधिकारीहरूका हकमा लागु हुनेछ । त्यस्तै अमेरिकामा अवैध आप्रवासनलाई जानाजानी सहयोग पुर्याउन जिम्मेवार सबै व्यक्तिका सन्दर्भमा यो प्रतिबन्ध लागु हुने अमेरिकी विदेश मन्त्रालयले जनाएको छ ।
अध्यागमन कानून लागू गर्न असफल भएमा वा अमेरिकाको दक्षिणपश्चिम सिमाना हुँदै गैरकानूनी रूपमा अमेरिकामा प्रवेश गर्न चाहने विदेशीहरूको ट्रान्जिटलाई जानाजानी सहज बनाउने नीति र अभ्यासहरू स्थापना र कार्यान्वयन गर्ने लगायतलाई पनि भिसा प्रतिबन्ध लगाइने भएको छ । आप्रवासी मार्गहरूमा रहेका देशहरूले गैरकानूनी रूपमा अमेरिकामा प्रवेश गर्न खोज्ने विदेशीहरूको ट्रान्जिटलाई रोक्नको लागि आफ्नो भूमिका खेल्नुपर्ने रुबियोले वक्तव्यमार्फत बताएका छन् ।
यो नयाँ नीतिले २०२४ मा विस्तार गरिएको अवस्थित थ्रीसी नीतिलाई पूरक बनाउने विदेश मन्त्रालयको भनाई छ । २०२४ को नीति निजी क्षेत्रका ट्राभल एजेन्सी लगायतसँग सम्बन्धित छ जसमा जानीजानी अमेरिकामा अवैध आप्रवासनका लागि यातायात र यात्रा सेवाहरू प्रदान गर्नेहरुलाई भिसा प्रतिबन्ध लगाउने उल्लेख थियो ।
ती अधिकारीहरूले अवैध आप्रवासन र ट्रान्जिट रोक्नको लागि कानून लागु नगरेसम्म उनीहरुमाथिका प्रतिबन्धहरु जारी रहने रुबियोको भनाई छ । उनले राष्ट्रिय सुरक्षा हितको रक्षा गर्न अमेरिका पछि नहट्ने बताएका छन् ।
यो भिसा प्रतिबन्ध नीति अध्यागमन र राष्ट्रियता ऐनको धारा ए ३ सी अनुसार भएको विदेश मन्त्रालयले जनाएको छ । यो ऐनले अमेरिकामा प्रवेश गर्दा लागि सम्भावित रूपमा गम्भीर प्रतिकूल विदेश नीति परिणामहरू हुन सक्ने कुनै पनि विदेशीलाई भिसा प्रतिबन्ध लगाउनसक्ने अधिकार अमेरिकी विदेशमन्त्रीलाई दिएको छ । उनीहरुका परिवारका सदस्यहरू पनि यी प्रतिबन्धहरूमा समावेश हुनसक्ने जनाइएको छ ।