युएससीआईएसले ग्रिनकार्ड र नागरिकता लगायत ९ प्रकारका आवेदकका सामाजिक सञ्जाल जाँच गर्ने
प्रकाशित मिति : फाल्गुन २०, २०८१ मंगलबार
युएससीआईएसले ग्रिनकार्ड र नागरिकता लगायत ९ प्रकारका आवेदकका सामाजिक सञ्जाल जाँच गर्ने योजना बनाएको छ । त्यसका लागि युएससीआईएसले आप्रवासन सम्बन्धी लाभका लागि आवेदन दिने व्यक्तिहरूका सामाजिक सञ्जाल प्रोफाइलहरु सङ्कलन गर्ने नयाँ पहलको घोषणा गरेको छ।
बुधबार मार्च ५ मा फेडरल रजिस्टरमा प्रकाशित हुने ६० दिनको सूचनामा यसबारे विस्तृत रूपमा उल्लेख गरिएको छ । अमेरिकालाई विदेशी आतङ्कवादीहरू र अन्य राष्ट्रिय सुरक्षा तथा सार्वजनिक सुरक्षाका खतराहरूबाट जोगाउने सम्बन्धि राष्ट्रपति डोनाल्ड ट्रम्पको कार्यकारी आदेश १४१६१ द्वारा निर्देशित पहिचान प्रमाणीकरण र राष्ट्रिय सुरक्षा जाँच प्रक्रियालाई बलियो बनाउने यो योजना बनाइएको युएससीआईएसले जनाएको छ ।
नयाँ योजना अनुशार विभिन्न आप्रवासन फारमहरूमा आवेदकहरूले आफ्ना सामाजिक सञ्जाल ह्यान्डलहरू र सम्बन्धित प्लेटफर्मका नामहरू प्रदान गर्नुपर्नेछ । यो उपाय जनवरी २०, २०२५ मा हस्ताक्षरित कार्यकारी आदेशको धारा २ को अनुपालन गर्न डिजाइन गरिएको हो, जसले एकसमान जाँच मापदण्ड र आप्रवासन लाभ अस्वीकार वा अयोग्यताका सबै आधारहरूको कडा जाँचको माग गर्छ।
फेडरल रजिस्टरको सूचनामा भनिएको छ -“कार्यकारी आदेश १४१६१ ले एकसमान जाँच मापदण्डहरूको कार्यान्वयनलाई निर्देश गर्छ र आप्रवासन सम्बन्धी लाभ अस्वीकार वा अयोग्यताका सबै आधारहरूको कडा जाँचका लागि आवश्यक सबै जानकारी सङ्कलन गर्न आवश्यक ठान्छ। यो कार्यकारी आदेशको कार्यान्वयनले यूएससीआईएसलाई आप्रवासन फारमहरू र जानकारी सङ्कलन प्रणालीहरूमा सामाजिक सञ्जाल प्रोफाइलहरुको डेटा सङ्कलन गर्न आवश्यक बनाउँछ। यो डेटा आप्रवासन सम्बन्धी लाभका लागि आवेदन गर्ने निश्चित समूहका व्यक्तिहरूबाट सङ्कलन गरिनेछ र यो कार्यकारी आदेशअनुसार सञ्चालन गरिने पहिचान प्रमाणीकरण, जाँच, राष्ट्रिय सुरक्षा जाँच, र निरीक्षणका लागि आवश्यक छ।”
सूचनामा थप स्पष्ट पार्दै भनिएको छ -“यो जानकारी सङ्कलन कार्यकारी आदेशको धारा २ सँग अनुपालन गर्न आवश्यक छ, जसले यूएससीआईएसलाई आवेदकको आप्रवासन सम्बन्धी लाभ प्राप्त गर्न योग्यता मूल्याङ्कन गर्न सक्षम बनाउने बढाइएको जाँच र जाँच मापदण्डहरू र प्रक्रियाहरू स्थापना गर्छ। यो डेटा सङ्कलनले आवेदकको पहिचान प्रमाणित गर्न र त्यस्तो लाभ प्रदान गर्नाले संयुक्त राज्यको सुरक्षा वा सार्वजनिक सुरक्षामा खतरा निम्त्याउँछ कि निम्त्याउँदैन भनेर निर्धारण गर्न पनि सहयोग गर्छ।”
यो सङ्कलन नागरिकताको लागि आवेदन, यात्रा कागजातको लागि आवेदन, ग्रिनकार्डका लागि आवेदन जस्ता ९ वटा फारमहरूमा लागू हुनेछ। यी फारमहरू बर्षमा अनुमानित ३५ लाखले भर्ने अनुमान गरिएको छ । यो नियमका लागि ६० दिनको सार्वजनिक टिप्पणी अवधि पनि तोकिएको छ । उक्त अवधि आगामी मे ४, २०२५ सम्म खुला रहनेछ।