नेटोको भविष्यलाई लिएर युरोपेली देशहरु चिन्तामा
प्रकाशित मिति : फाल्गुन १३, २०८१ मंगलबार
अमेरिका र रुसबीचमा विकसित भएको नयाँ सम्वन्धले नेटोको भविष्य संकटमा परेको विश्लेषकहरुले बताएका छन ।
कतिपय युरोपेली देशका नेताहरुले समेत नेटोको आगामी यात्राको बारेमा चिन्ता प्रकट गरेका छन ।
अमेरिकी राष्ट्रपति डोनाल्ड ट्रम्प र रुसी राष्ट्रपति भ्लादिमिर पुटिनबीच नाटकीय रुपमा सम्वन्ध स्थापना र विस्तार भएको देखिएको छ ।
दोस्रो विश्वयुद्ध पछि पश्चिमी युरोपेली देशहरूले अमेरिकासँग र क्यानडासँग मिलेर सोभियत संघको विरुद्धमा नेटो (उत्तर एटलांटिक सन्धि संगठन) स्थापना गरेका थिए ।
सन्धिको अनुच्छेद ५ का अनुसार नेटोका सदस्यहरूले कुनै पनि साझेदारमाथि आक्रमण भएमा त्यसको रक्षा गर्नुपर्ने उल्लेख छ।
अमेरिका लामो समयदेखि नेटोको मुख्य शक्ति रहेको छ । तर अहिले भने नेटोको भविष्यको बारेमा खुलेआम प्रश्न उठिरहेका छन् ।
अमेरिकाले परिच्छेद ५ र नेटोका महासचिवमा कमजोर बनाइरहेका युरोपेली मुलुकहरुको भनाई रहेको छ ।
जर्मनीका नयाँ चान्सलर बन्ने तयारीमा रहेका फ्रेडरिक मर्जले सुरक्षा क्षेत्रमा अमेरिकाबाट स्वतन्त्रता प्राप्त गर्नु आफनो लक्ष्य रहेको बताएका छन ।
ट्रम्प प्रशासनले नेटोबाट बाहिर नजाने बताइरहेको छ । अमेरिकाले आफु युरोपसँगको सुरक्षा साझेदारीमा प्रतिबद्ध रहेको बताएको छ ।
तर अमेरिकाले निर्भरता बढाउने खालका असमान सम्बन्धलाई नसहने बताएको छ । ट्रम्पले लगातार युरोपेली साझेदारहरूलाई आफ्ना आर्थिक योगदानहरू धेरै बढाउन भनेका छन् ।
रुस र युक्रेनबीचको युद्धलाई महाद्वीपको सबैभन्दा ठूलो सुरक्षा संकटको रुपमा लिइएको छ । नेटोमा अमेरिकाको ७० प्रतिशत योगदान रहेको छ ।
युरोपमा १ लाख भन्दा बढी अमेरिकी सैनिकहरू तैनाथ छन् । अमेरिकाले आणविक हतियारहरूको मुख्य हिस्सा पनि नेटोका सदस्यहरुलाई प्रदान गर्दछ ।
नेटोका मुख्य सहित वरिष्ठ भूमिकाहरुमा अमेरिकीहरु नै रहेका छन ।