अमेरिका नछाड्ने, दर्ता नगर्ने र ठेगाना परिवर्तनको जानकारी नदिने आप्रवासीलाई आपराधिक दण्ड
प्रकाशित मिति : फाल्गुन १३, २०८१ मंगलबार
अब जानाजान अमेरिका नछाडे, एलियन दर्ता नगरे र संघीय सरकारलाई ठेगाना परिवर्तनको जानकारी नदिए आपराधिक दण्ड दिइने डिपार्टमेन्ट अफ होमल्याण्ड सेक्युरिटी सेक्रेटरी क्रिस्टी नोमले घोषणा गरेकी छिन् । सेक्रेटरी नोमले आज अमेरिकामा गैर नागरिकहरुलाई दण्डित गर्ने कानून लागू गर्ने घोषणा गरेकी हुन् । जस अनुशार डिपार्टमेन्ट अफ होमल्याण्ड सेक्युरिटी कागजात नभएका विदेशीहरूलाई सेल्फ डिपोर्ट गर्न बाध्य पार्न हरेक उपलब्ध उपकरण प्रयोग गर्ने नोमले घोषणा गरेकी छिन् ।
अध्यागमन र राष्ट्रियता ऐनलाई पूर्ण रूपमा लागू गर्ने तथा कागजात नभएका विदेशीहरूलाई ट्र्याक गर्न र उनीहरूलाई स्वेच्छाले देश छोड्न बाध्य पार्न धेरै उपकरणहरू सिर्जना गरेको डिपार्टमेन्ट अफ होमल्याण्ड सेक्युरिटीले जनाएको छ । एक कागजातविहीन विदेशीले अमेरिका छोड्न असफल हुनु अपराध भएको र यसले महत्त्वपूर्ण आर्थिक दण्डको परिणाम हुनसक्ने चेतावनी दिइएको छ ।
दर्ता गर्न असफल हुनु अपराध भएको र यसको परिणाम जरिवाना, कैद वा दुवै सजाय हुन सक्ने चेतावनी दिइएको छ । दशकौंदेखि, यो कानूनलाई बेवास्ता गरिएको तर अब नगरिने नोमको चेतावनी छ । स्वेच्छिकरुपमा देश छाड्नु विदेशीहरू र कानून प्रवर्तनका लागि सुरक्षित मार्ग भएको उल्लेख गर्दै यसबाट अमेरिकीहरूलाई सुरक्षित राख्न आवश्यक पर्ने स्रोतहरूको संरक्षण हुनुका साथै अमेरिकी करदाताको डलर बचत हुने वक्तव्यमा जनाइएको छ ।
डिपार्टमेन्ट अफ होमल्याण्ड सेक्युरिटीका प्रवक्ताले भनेका छन् -“राष्ट्रपति ट्रम्प र सेक्रेटरी नोमसँग अमेरिकामा गैरकानुनी रूपमा बस्नेहरूका लागि स्पष्ट सन्देश छ, अब अमेरिका छोड्नुहोस्। यदि तपाईंले अहिले छोड्नुभयो भने, तपाईंसँग फर्कने र हाम्रो स्वतन्त्रताको आनन्द लिने र अमेरिकी सपना बाँच्ने अवसर हुन सक्छ। ट्रम्प प्रशासनले हाम्रा सबै अध्यागमन कानूनहरू लागू गर्नेछ । हामीले लागू गर्ने कानूनहरू छनौट गर्ने छैनौं। हामीले हाम्रो मातृभूमि र सबै अमेरिकीहरूको सुरक्षा र सुरक्षाको लागि हाम्रो देशमा को छ भनेर जान्नुपर्दछ। ”