बेलायतका प्रधानमन्त्री स्टार्मरले भने : युक्रेनलाई रुसबाट जोगाउन अमेरिकाको सहयोग अनिवार्य छ
प्रकाशित मिति : फाल्गुन ५, २०८१ सोमबार
बेलायतका प्रधानमन्त्री सर कीर स्टार्मरले युक्रेनमा शान्ती सुनिश्चित गर्नका लागि अमेरिकी सहयोग अनिवार्य रहेको बताएका छन् ।
उनले युक्रेनको शान्ति सम्झौतामा रुसलाई फेरी युक्रेनमाथि आक्रमण गर्नबाट रोक्नका लागि अमेरिकी सहयोग , समर्थन र सहभागिता अनिवार्य भएको बताएका हुन ।
पेरिसमा युरोपेली नेताहरूको आकस्मिक बैठक पछि कुरा गर्दै बेलायती प्रधानमन्त्रीले शान्ति सम्झौता लामो समयसम्म कायम रहन्छ भने युक्रेनमा बेलायती सैनिकहरू पठाउने कुरा विचार गर्न सक्ने बताए ।
रुसलाई प्रभावकारी रूपमा रोक्नका लागि अमेरिकी सुरक्षा ग्यारेन्टी मात्र प्रभावकारी उपाय हो भन्दै उनले अमेरिकी राष्ट्रपति डोनाल्ड ट्रम्पसँगको बैठकमा शान्ति सम्झौताका मुख्य तत्वहरूका बारेमा छलफल गर्ने बताए ।
रुसले ल्याएको सुरक्षा चुनौतीको सामना गर्न यूरोपले आफैंलाई रक्षा गर्नका लागि थप प्रयास गर्नुपर्ने उनले बताएका छन्।
युक्रेन युद्धका विषयमा छलफल गर्न अमेरिका र रुसका अधिकारीकाबीचमा साउदी अरबमा मंगलबारदेखि वार्ता सुरु हुने तय भएको छ । तर उक्त वार्तामा युक्रेन र युरोपेली देशलाई खबर नगरिएको बताइएको छ ।
युक्रेनी राष्ट्रपति भोलोदिमिर जेलेन्स्कीले वार्ताबारे जानकारी नपाएको बताएका छन । उनले कुनै पनि सम्झौता युक्रेनलाई समावेश नगरी गरिए मान्य नहुने स्पष्ट पारेका छन ।
अमेरिकी अधिकारीहरूले युरोपेली देशहरूलाई शान्ति वार्तामा परामर्श गरिने बताएका छन । तर उनीहरूलाई सिधै वार्तामा संलग्न नगराइने बताएका छन ।
अमेरिकी रक्षा मन्त्री पिट हेगसेथले युरोपले आफ्नो सुरक्षा सुनिश्चित गर्नका लागि प्रमुख जिम्मेवारी लिनुपर्नेछ भनेर धारणा सार्वजनिक गरेपछि पेरिस सम्मेलन आयोजना गरिएको हो ।
प्रधानमन्त्री कीरले अमेरिका नाटोबाट बाहिर जान चाहँदैन भनेका छन । तर हामी हाम्रो सुरक्षा र महादेशको जिम्मेवारी लिनुपर्ने बेला आएको उनले भनेका छन ।