युक्रेनको सुरक्षाका लागि सेना पठाउन बेलायत तयार रहेको प्रधानमन्त्री स्टार्मरको संकेत
प्रकाशित मिति : फाल्गुन ४, २०८१ आईतबार
बेलायती प्रधानमन्त्री कीर स्टार्मरले युक्रेनको सुरक्षाका लागि सेना पठाउन तयार रहेको बताएका छन । उनले आवश्यक भएमा युक्रेनको सुरक्षा सुनिश्चित गर्नका लागि बेलायत सैनिकहरू युक्रेनमा पठाउन तयार रहेको बताएका हुन ।
उनले भविष्यमा रुसी राष्ट्रपति पुटिनलाई थप आक्रमणबाट रोक्न चाहने हो भने युक्रेनमा स्थायी शान्ति सुनिश्चित गर्नु महत्वपूर्ण हुने स्पष्ट पारे ।
सोमबार पेरिसमा आयोजना गरिएको युरोपेली नेताहरूसँग आपतकालीन शिखर सम्मेलनमा सहभागी हुनुअघि प्रधानमन्त्री कीरले युक्रेनको सुरक्षा ग्यारेन्टीको लागि बेलायत आफ्ना सैनिकहरू युक्रेनमा पठाउन तयार रहेको प्रष्ट पारेका हुन ।
बेलायतका सैनिकलाई जोखिममा राख्नु कम जिम्मेवारी नहुने भन्दै उनले समग्र युरोपको सुरक्षासँग जोडिएकाले आफु तयार भएको बताएका हुन ।
युक्रेनको सुरक्षा सुनिश्चित गर्न मद्दत गर्ने कुनै पनि भूमिका भनेको समग्र महादेशको सुरक्षा र यहाँ रहेका देशको सुरक्षा सुनिश्चित गर्नु हो भनेर भुल्न नहुने बेलायती प्रधानमन्त्रीको भनाई छ ।
बेलायतका सैनिकहरू युक्रेनको कब्जामा रहेका क्षेत्र र रूसले कब्जा गरेको क्षेत्रको सीमा नजिकका स्थानहरूमा अन्य युरोपेली राष्ट्रका सैनिकहरूसँग मिलेर तैनात हुन सक्ने उनले बताए ।
प्रधानमन्त्री कीर यसै महिना अन्त्यमा राष्ट्रपति डोनाल्ड ट्रम्पसँग भेटगर्न अमेरिका जाँदैछन ।
त्यहाँ रहदा उनले अमेरिकी सुरक्षा ग्यारेन्टी स्थायी शान्तिका लागि आवश्यक रहेको बताउने छन । किनकि अमेरिकाले मात्रै पुटिनलाई फेरि आक्रमण गर्नबाट रोक्न सक्छ भन्नेमा स्पष्ट रहेको उनको भनाई छ ।
अमेरिकाले युक्रेन युद्धसँग जोडिएका बिषयमा रूससँग शान्ति वार्ताका लागि तयारी गरिरहेको छ । अमेरिकी विदेश मन्त्री मार्को रुबियोले साउदी अरबमा रूसका अधिकारीहरूसँग भेट गर्ने योजना बनाएका छन् ।
बेलायतले अहिले आफ्नो जीडीपीको २.३ प्रतिशत रक्षामा खर्च गर्दैछ । उसले यो अर्थतन्त्रको २.५ प्रतिशत रक्षा खर्च बढाउने प्रतिबद्धता जनाइसकेको छ । तर यसका लागि कुनै समय सीमा दिइएको छैन ।
ट्रम्पले नाटो सदस्यहरूलाई आफ्नो जीडीपीको ५ प्रतिशत खर्च रक्षामा गर्न आह्वान गरेका छन् ।