भारतीय प्रधानमन्त्री मोदी अमेरिका पुगेपछि भने : ट्रम्पसँग भेट गर्न आतुर र उत्साही छु
प्रकाशित मिति : फाल्गुन १, २०८१ बिहीबार
भारतका प्रधानमन्त्री नरेन्द्र मोदी अमेरिका पुगेका छन । विहिबार बिहान मोदी वाशिंगटन डीसी पुगेका हुन ।
यूएस प्रेसिडेन्सियल गेस्ट हाउस ब्लेयर हाउसमा उनलाई बस्नको लागि प्रबन्ध गरिएको छ ।
अमेरिकामा अहिले अत्यन्तै चिसो मौसम छ । तरपनि भारतीय मूलका धेरै व्यक्तिहरू प्रधानमन्त्रीको स्वागत गर्न ब्लेयर हाउस पुगेका थिए ।
प्रधानमन्त्री मोदीले अमेरिकामा रहँदा राष्ट्रपति डोनाल्ड ट्रम्पसँगको भेट गर्नेछन । त्यसअबसरमा द्विपक्षीय वार्ता हुनेछ । संयुक्त पत्रकार सम्मेलन हुनेछ ।
राष्ट्रपति ट्रम्पले प्रधानमन्त्री मोदीको सम्मानमा डिनरको आयोजना गर्ने कार्यसूचि रहेको छ ।
अमेरिका पुगेपछि भारतीय प्रधानमन्त्री मोदीले राष्ट्रपति ट्रम्पसँग भेट्न उत्सुक र आतुर रहेको बताएका छन । उनले भारत र अमेरिकाबीचको वैश्विक रणनीतिक साझेदारी बनाउनको लागि उत्साहित रहेको बताए ।
ट्रम्पसँगको भेटअघि उनले अमेरिकी गुप्तचर विभागकी प्रमुख तुलसी गबार्डसँग पनि भेट गर्नेछन ।
ट्रम्प र मोदीको भेटमा व्यापार, लगानी, ऊर्जा, रक्षा, प्रविधि र आप्रवासनका विषयमा वार्ता हुने संभावना छ । दुवै नेताबीच आयात करको बारेमा पनि कुरा हुनसक्ने संभावना रहेको छ ।
ट्रम्पले राष्ट्रपति पद सम्हालेपछि भेट गरेका विदेशी नेताहरु मध्ये मोदी चौथो नेता हुन ।
ट्रम्पले दोस्रो कार्यकालको पहिलो महिनामा इजरायलका प्रधानमन्त्री बिन्यामिन नेतन्याहू, जापानका प्रधानमन्त्री शिगेरु इशिबा र जोर्डनका राजा अब्दुल्लाह द्वितीयसँग व्हाइट हाउसमा भेट गरेका छन् ।