च्याट जिपीटी किन्ने मस्कको प्रस्ताव, आल्टम्यानले दिएको जवाफ यस्तो छ ?
प्रकाशित मिति : माघ २८, २०८१ सोमबार
अमेरिकी खर्वपति एलोन मस्कले च्याट जिपीटी खरिद गर्ने प्रस्ताव गरेका छन । उनको नेतृत्वमा रहेको लगानीकर्ताहरुको समूहले च्याट जिपीटी किन्ने प्रस्ताव गरेको हो ।
उनले च्याट जिपीटी खरिद गर्नका लागि ९७ दशमलव चार अर्ब अमेरिकी डलर रकमको प्रस्ताव गरेको सञ्चार माध्यमहरुले बताएका छन ।
उनका वकिल मार्क टोबेरोफले सोमवार OpenAI को बोर्डमा यो रकम प्रस्ताव गरेका पुष्टि गरेका छन ।
संसारका सबैभन्दा धनी व्यक्ति र अमेरिकी राष्ट्रपति डोनाल्ड ट्रम्पका दाहिने हातको रूपमा चिनिएका मस्क र च्याट जिपीटी का मुख्य कार्यकारी अधिकारी साम आल्टम्यान बीच लामो समयदेखि चलिरहेको संघर्षको पछिल्लो मोडको रुपमा यसलाई हेरिएको हो ।
प्रस्तावको प्रतिक्रिया स्वरूप आल्टम्यानले मस्कको सामाजिक मिडिया प्लेटफर्म X मा लेखेका छन् ‘धन्यवाद, तर यदि तपाईं चाहनुहुन्छ भने हामी ट्विटर ९.७४ बिलियनमा किन्नेछौं।’
OpenAI लाई कृत्रिम बुद्धिमत्ता उपकरणहरूलाई मुख्यधार बनाउने र यस क्षेत्रमा ठूलो लगानीको सुरुआत गर्ने श्रेय दिइन्छ ।
मस्क र आल्टम्यानले २०१५ मा OpenAI को स्थापना गरेका थिए । तर २०१८ मा मस्क कम्पनीबाट बाहिरिए पछि उनीहरूको सम्बन्ध बिग्रिएको छ ।
आल्टम्यानले कम्पनीलाई लाभको लागि काम गर्ने संस्थाको रूपमा पुनर्गठन गर्ने योजना बनाएको देखिन्छ ।