फेब्रुअरी ८ देखि अमेरिकी दूतावास काठमाडौंको अप्वाइन्टमेन्ट प्रणालीमा परिवर्तन
प्रकाशित मिति : माघ १९, २०८१ शनिबार
फेब्रुअरी ८ देखि अमेरिकी दूतावास काठमाडौंको अप्वाइन्टमेन्ट प्रणालीमा परिवर्तन गर्न लागिएको छ। उक्त मितिदेखि लगइन, प्रोफाइल, र अप्वाइन्टमेन्ट लिनेसम्बन्धी पृष्ठहरूको नयाँ स्वरूप हुने अमेरिकी दूतावास काठमाडौंले जनाएको छ। लगइन गर्ने वेब ठेगाना पनि अघिल्लो प्रणालीभन्दा फरक हुनेछ।
नयाँ प्रणालीबाट लगइन गर्नेहरूले नयाँ प्रोफाइल बनाउनुपर्नेछ, र यो व्यवस्था विद्यमान प्रयोगकर्ताहरूलाई पनि लागू हुने दूतावासले जनाएको छ। नयाँ प्रणालीमा बालबालिका लगायत प्रत्येक भिसा आवेदकको आफ्नै इमेल ठेगानासहितको प्रोफाइल अनिवार्य हुने तथा इमेल ठेगाना सक्रिय रूपमा काम गर्ने हुनुपर्ने दूतावासले स्पष्ट पारेको छ।
साइनअप लिङ्कमा क्लिक गरेर प्रोफाइल दर्ता गर्न सकिनेछ भने विद्यमान प्रयोगकर्ताहरूले अघिल्लो भुक्तानी रसिद र भविष्यमा अप्वाइन्टमेन्ट लिन दर्ता गरिएको पहिलेकै इमेल प्रयोग गर्नु अनिवार्य हुनेछ। यदि भिसा शुल्क २०२५ को फेब्रुअरी ३ तारिख वा त्यसअघि नै बुझाइएको भए तर प्रोफाइलमा आबद्ध नगरिएको भए, साइनअप लिङ्कमा गएर आफ्नो रसिद लिनुपर्ने दूतावासले जनाएको छ।
नयाँ प्रणाली लागू हुनुअघि, फेब्रुअरी ५ देखि ७ सम्म शुल्क भुक्तानी सेवाहरू उपलब्ध नहुने, कल सेन्टरका सेवाहरू उपलब्ध नहुने, तथा अन्तरवार्ताको समय निर्धारण वा पुनः निर्धारण गर्न नपाइने दूतावासले स्पष्ट पारेको छ। तर, सबै पूर्वनिर्धारित अन्तरवार्ताहरू सामान्य रूपमा सञ्चालन हुनेछन्। साथै, पासपोर्ट बुझाउने र लिने सुविधा पनि उपलब्ध हुनेछ। अन्तरवार्ता छुट तथा अपुग कागजात बुझाउने सुविधा पनि यथावत् रहनेछ।